ВАРЗИШ
Душанбе 14 Октябр 2019 05:50
2501
Нуриддин Давронов Аҳмадбекович 16 январи 1991 дар оилаи ҳунарманд ба дунё омадааст. Аз хурдӣ ба варзиш шавқи беандоза дошт. Мегӯяд: “Вақте дар кӯдакиам бисёр шавқу ҳаваси футболбоз шуданро доштам, падарам маро ба мактаби варзишии “Динамо” бурданд. Дар он ҷо бо дастгирии аввалин мураббиам Валерий Урунов нозукиҳои футболро омӯхтам. Баъди чанд муддат хостам тамринро берун аз кишвар идома диҳам ва аъзои оила ба хулосае омаданд, ки маро ба мактаби футболи “Минск”-и Беларус баранд”.

Нуриддин таҷрибаи футболбозиашро дар мактаби футболи кӯдаконаи Минск сайқал дода, соли 2006 ба Ватан баргашта, шомили дастаи хурдсолони “Энергетик” (Душанбе) мешавад. Нуриддин сабаби ба дастаи хурдсолони “Энергетик” дохил шуданашро чунин иброз медорад: “Ман мехостам дар тими мунтахаби то 17-солаҳои Тоҷикистон бозӣ кунм. Бо ин сабаб ба дастаи “Энергетик” омадам, то ки сармураббии онвақтаи тими 17-солаҳои кишвар Пулод Қодиров бозии маро бинад ва маро ба дастаи мунтахаб шомил гардонад. Дар дастаи “Энергеник” бозии хуб нишон додам ва мураббии тими 17-солаҳои кишвар маро ба даста даъват намуд”.

Соли 2007 ба Нириддин муясар шуд, ки бо ҳайати тими 17-солаҳои Тоҷикистон дар ҷоми ҷаҳон ширкат намояд. Ҷоми ҷаҳон соли 2007 дар Кореяи Ҷанубӣ бо ширкати 24 даста баргузор гардид. Дастаи мунтахаби ҷавонони то 17-солаи Тоҷикистон дар гурӯҳи “Е” бо тимҳои пурқуввати ҷаҳон -  Иёлоти Муттаҳидаи Амрико, Тунис ва  Белгия қувва озмуд ва дар гурӯҳ ҷойи сеюмро ишғол кард.  Дар бозӣ бо тими Иёлоти Муттаҳидаи Амрико бозингарони кишвар, алалхусус Нуриддин, ки голи ҳалталабро ба ҳадаф расонид, маҳорати хуби футболбозиашонро нишон доданд (3-4). Пас аз ҷоми ҷаҳон Нуриддинро дастаи ҷавонони “Локоматив”-и Москва ба ҳайаташ даъват намуд ва ӯ то соли 2009 бо ин тим шартнома баст. Моҳи январи соли 2009 ба Ватан баргашта, ба дастаи “Истиқлол”-и Душанбе шомил шуд. Соли 2012 Нуриддин бо дастаи “Истиқлол” Ҷоми президенти Конфедератсияи футболи Осиё (КФО)-ро ба даст овард. Дар он давра “Истиқлол”-ро мураббии сербиягӣ Никола Кавазович тамрин медод. Бо кӯмаки Никола Кавазович соли 2013 Давроновро дастаи “Слобода”-и  Сербия даъват кард. Дар ҳайати ин даста 2 марти соли 2013 дар бозӣ бо тими “Борчи” бори нахуст ба майдон баромад. Худи ҳамон сол боз ба дастаи “Истиқлол” баргашта, то соли 2016 шартнома баст.

Нуриддин дар ҳайати дастаи “Истиқлол” 71 бозӣ карда, 9 гол задааст. Соли 2016 тими “Дунав”-и Булғористон бо футболбози 26-солаи тоҷик дусола шартнома баст. Дастаи “Истиқлол”-и Душанбе соли 2017 дар пеши худ мақсад гузоштааст, ки ғолиби Ҷоми КФО гардад. Бо ин сабаб собиқ капитани дастаашро то охири моҳи июл аз дастаи “Дунав” ба иҷора гирифт.

Нуриддин Давронов соли 2008 ба ҳайати тими миллии Тоҷикистон дохил мешавад. Голи аввалинашро дар тими мунтахаб 9 марти соли 2012 ба дарвозаи дастаи мунтахаби Ҳиндустон задааст. Дар ҷамъ дар тими мунтахаби кишвар то имрӯз 39 бозӣ анҷом дода 9 гол задааст.

Нуриддин соли 2012 беҳтарин нимҳимоятгари Тоҷикистон дониста шуд. Федератсияи футболи Тоҷикистон ба ӯ соли 2014 низ унвони беҳтарин нимҳимоятгари солро дода, ӯро Роналдои тоҷик гуфтааст. Нуриддин мегӯяд, ки “барои ман шараф аст, ки имрӯз мухлисони футболи тоҷик маро ба ин футболбози машҳур баробар мекунанд”.

Нуриддин бо “Истиқлол” ду бор унвони чемпиони Тоҷикистон (2010, 2011), ду бор Ҷоми Тоҷикистон (2009, 2010), се бор Абарҷоми Тоҷикистон (2010, 2011, 2012), як маротиба ҷоми президенти КФО (2012)-ро соҳиб гаштааст. Бо тими мунтахаби Тоҷикистон соли 2008 медали нуқраи Ҷоми даъватии КФО-ро ба даст овардааст.

Шаҳбози АСОМИДДИН, "ҶТ"

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
30 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31 1 2 3

Октябр 2019 c.