Ба ифтихори Рӯзи пойтахт 20 апрел, 10-ум Ниммарафони байналмилалии Душанбе баргузор гардид.

Дар он қатори 100 даванди Тоҷикистон, инчунин 36 варзишгар аз 17 давлат иштирок карданд. 

10-ум Ниммарафони байналмилалии Душанбе чун анъана дар масофаи 21.97 километр дар масири Наврӯзгоҳ – майдони “Дӯстӣ” (тавассути хиёбони Ҳофизи Шерозӣ то маҳаллаи Чорбоғ ва аз он ҷо тавассути хиёбони Рӯдакӣ то муҷассамаи Исмоили Сомонӣ) сурат гирифт. 

Миёни мардон Фенти Тилахан аз Эфиопия бо натиҷаи 1:06:36 ғолиб шуд. Ухимчук Микола аз Украина бо натиҷаи 1:06:58 ҷойи дуюм, Михаил Қосимов аз Ҷумҳурии Қазоқистон бо натиҷаи 1:10:01 ҷойи сеюм, Жоодар Кочконбаев аз Ҷумҳурии Қирғизистон бо натиҷаи 1:10:43 ҷойи чорум, Майна Самуел аз Кения бо натиҷаи 1:11:19 ҷойи панҷум ва Андрей Петров аз Ҷумҳурии Узбекистон бо натиҷаи 1:11:43 ҷойи шашумро ишғол карданд.

Миёни занон Даря Маслова аз Ҷумҳурии Қирғизистон бо натиҷаи 1:14:45 ҷойи аввалро сазовор шуд. Ӯ соли гузашта низ ғолиби Ниммарафони Душанбе гардида буд. Гуангул Хирут аз Эфиопия бо натиҷаи 1:16:51 ҷойи дуюм, Ситора Ҳомидова аз Ҷумҳурии Узбекистон бо натиҷаи 1:18:29 ҷойи сеюм, Мурунги Беттӣ аз Кения бо натиҷаи 1:23:29 ҷойи чорум, Назарова Меҳрангез аз Ҷумҳурии Тоҷикистон бо натиҷаи 1:30:14 ҷойи панҷум ва Уляна Кузминова аз Ҷумҳурии Тоҷикистон бо натиҷаи 1:32:43 ҷойи шашумро сазовор гардиданд.

Дар се соли охир бори аввал аст, ки варзишгарони тоҷик дар қатори шашгонаи аввал ҷой мегиранд. Натиҷаи беҳтарини варзишгарони тоҷик дар нуҳ даври ниммарафони байналмилалӣ ҷойҳои чоруми Ҳасан Ғаффоров (солҳои 2013 ва 2016) байни мардон ва Надима Мирзоева (соли 2010 ) миёни занон мебошад.

Ёдовар мешавем, ки аввалин бор Ниммарафони байналмилалӣ дар Душанбе ба масофаи 21 километру 97,5 метр бо иштироки варзишгарон аз 14 бародаршаҳри Душанбе ва беҳтарин давандаҳои Тоҷикистон моҳи апрели соли 2010 баргузор гардида буд ва аз соли 2014 ба рӯйхати мусобиқоти дави ҷаҳонӣ шомил шуд.