Федератсияи футболи Хатлон ҷадвали бозиҳои даври муқаддамотии Ҷоми ФФТ-ро дар мавсими 2017 тасдиқ кард. Дар даври пешакӣ дар вилоят 11 даста дар ду гурӯҳ барои роҳхат ба даври финалӣ талош мекунанд.

Бозиҳои гурӯҳи "А" дар варзишгоҳи марказии ноҳияи Абдураҳмони Ҷомӣ доир мегарданд. Ин ҷо барои роҳхат шаш даста талош мекунанд - «Вахш» (Қурғонтеппа), «Панҷшер» (Ҷалолиддин Балхӣ), «Саройкамар» (Панҷ), «Парвин» (Бохтар), «Арал» (Абдураҳмони Ҷомӣ) ва «Пахтакор» (Қубодиён). Бозиҳои гурӯҳи "Б" бо ширкати дастаҳои «Равшан» (Кӯлоб), «Ҳулбук» (Восеъ), «Сомон» (Данғара), «Сарҳадчӣ» (Ҳамадонӣ) ва «Шоҳин» (Муъминобод) дар варзишгоҳи ноҳияи Ҳамадонӣ баргузор мешаванд.

Дастаҳое, ки дар гурӯҳҳо ду ҷои аввалро сазовор мешаванд, дар даври нимфинал рақобат мекунанд. Ғолибон дар финал бо ҳам рӯбарӯ мешаванд. Бозиҳои нимфинал ва финал дар варзишгоҳи марказии ноҳияи Данғара доир мегардад.

Ёдовар мешавем, ки ба даври финалии Ҷоми ФФТ-2017, ки 10-19 феврал дар Душанбе баргузор мешавад, Хатлонро ду даста намояндагӣ мекунанд.

Дар акс тими "Сомон"-и Данғара