Бо ибтикори Ассотсиатсияи Сайёҳии Экологӣ-Фарҳангии Помир (АСЭФП) дар ҳамкорӣ бо Мақомоти иҷроияи маҳаллии ҳокимияти давлатии ВМКБ ва созмони МЕТА-и Мурғоб дар кӯли Қароқӯли ноҳияи мазкур панҷумин мусобиқаи ҷаҳонии “Қаиқронӣ дар боми ҷаҳон” (“Regatta in Roof of the World”) оғоз гардид.

Ба гуфтаи Жанпулот Қамчибеков, мудири Бахши кор бо ҷавонон ва варзиши ноҳияи Мурғоб имсол ҳам дар мусобиқа баробари қаиқронони хориҷӣ варзишгарони бомаҳорати кишвар рақобат намуда, он то 30 июли соли ҷорӣ идома меёбад:

“Ин як имконияти бузургест барои Ҷумҳурии Тоҷикистон, яъне Қароқӯл ҳамчун баландтарин кӯли қобили қаиқронӣ ва регаттаи бодбонӣ дар ҷаҳон аст ва бо ин рекорди ҷаҳонӣ метавонад ба иқтисодиёти кишвар мусоидат намояд”.

Бояд гуфт, ки теъдоди иштирокдорони мусобиқа сол аз сол меафзояд ва имсол низ дар мусобиқа қаиқронону сайёҳон беш аз 40 давлати дунё ҷамъ омаданд.



Машҳур ИМОМНАЗАРОВ, “ҶТ”