Шоми 17 май дар доираи бозиҳои гуруҳии Ҷоми КФО -2017 (Конфедератсияи футболи Осиё) дастаи “Истиқлол”-и Душанбе дар варзишгоҳи Долен Омурзоқови Қирғизистон тими “Дордой”-и Бишкекро бо ҳисоби 4-1 шикаст дод.

Муҳсин Муҳаммадиев сармураббии дастаи “Истиқлол” рӯзи 16 май дар нишасти хабарии пеш аз бозӣ, тими “Дордой”-ро рақиби пурқувват дониста иброз дошт: “ Барои баромадан аз гуруҳ танҳо ду бозӣ мондааст ва даста барои рақобат ҷиддӣ омода шудаст. Фардо дар майдон бозии душвор моро интизор аст, зеро тими “Дордой” бо як ҳадаф ба майдон мебарояд”.

Шогирдони Муҳсин Муҳаммадиев дар дақиқаи 8-ум пас аз партофти сардори даста Фатҳулло Фатҳуллоев ҳамлагари тим Манучеҳр Ҷалилов тавонист бо сар голи нахустини дидорро ба номаш сабт намояд. Манучеҳр Ҷалилов дар дақиқаҳои 46, 75-ум боз ду тӯби дигаро вориди дарвозаи қирғизҳо намуда, дар ин бозӣ хетрик намуд.

Дақиқаи 90-уми қисми дуюми бозӣ Муҳсин Муҳаммадиев Дмитрий Барковро бо футболбози ҷавон Эҳсони Панҷшанбе иваз намуд. Эҳсони Панҷшанбе дар дақиқаи 90+3 як партоф анҷом дод ва ин партофт ба пои Егор Потапов ҳимоятгари дастаи “Дордой” бархурда ба гол анҷом ёфт. Голи ягонаи соҳибони майдонро Сулаймон Зарифов дар дақиқаи 50-ум вориди дарвозаи Никола Стошич намуд.
Муҳсин Муҳаммадиев сармураббии дастаи “Истиқлол” пас аз ғолибият қайд намуд, ки: “Бениҳоят хушҳолам, ки имрӯз бозиро бо бурд анҷом додем ва бозии ҳалталаб рӯз 31-уми май дар варзишгоҳи марказии Тоҷикистон бо дастаи “Алтин Асир” доир мегардад ва мо омодагӣ мебинем барои бозии охирини гуруҳӣ”.

Манучеҳр Ҷалилов ҳамлагари дастаи “Истиқлол” аввалин хетрики худро дар Ҷоми КФО қайд намуда, ба мухлисон миннатдорӣ байён намуд: “Барои баромадан аз гуруҳ боз як қадами дигар монд. Дидори охирин бисёр вазнин ва душвор мегузарад. Мо дар хонаи худ барои ғолибият ба майдон мебароем ва умедорем, ки мухлисони тоҷик барои дастгирии тими “Истиқлол” ба варзишгоҳ ташриф меоранд”.
Дар бозии дигари даври панҷум дар гурӯҳи “D” рӯзи 17-уми май дастаи “Олтин Асир”-и Ашқобод, дар майдони худ бар тими “Олой”-и Ӯш, бо ҳисоби 4:1 пирӯз шуд. Чаҳор голи мизбононро Мурод Яхшиев дар дақиқаҳои 33, 42, 82 ва 84-ум ба самар расонд. Як голи меҳмононро Миролимҷон Аҳмадов дар дақиқаи 53-юм ба ҳадаф расонид.

Ёдовар мешавем, ки дар асоси дастури мусобиқа танҳо ғолиби гурӯҳ ба даври баъдии Ҷоми КФО роҳ меёбад. Барои роҳхати ягона дастаҳои “Истиқлол” ва “Олтин Асир” талош доранд.

Дастаи “Истиқлол” дар сафар бо тими “Алтин Асир”-и Туркманистон бо ҳисоби 1-1 бозӣ намудааст. Ҳарчанд тими “Истиқлол” бо тафовуди голҳо садрнишини гуруҳи “Д” аст, рӯзи 31-уми май ғолиби асосии гуруҳ муайян хоҳад шуд.

Ҷоми КФО-2017 гуруҳи “Д”.      Минтақаи марказӣ
Даври 1 14 март (сешанбе)
“Истиқлол” (Тоҷикистон) – “Дордой” (Қирғизистон) – 2:0
“Олой” (Қирғизистон) – “Олтин Асир” (Туркманистон) – 1:2

Даври 2 4 апрел (сешанбе)
“Олтин Асир» (Туркманистон) – “Истиқлол» (Тоҷикистон) – 1:1
“Дордой” (Қирғизистон) – “Олой» (Қирғизистон) -1:0

Даври 3 18 апрел (сешанбе)
“Истиқлол” (Тоҷикистон) – “Олой” (Қирғизистон) – 3:1
“Дордой” (Қирғизистон) – “Олтин Асир” (Туркманистон) – 0:2

Даври 4 3 май (чоршанбе)
“Олой” (Қирғизистон) – “Истиқлол” (Тоҷикистон) – 1:4
“Олтин Асир” (Туркманистон) – “Дордой” (Қирғизистон) – 3:0

Даври 5 17 май (чоршанбе)
“Дордой” (Қирғизистон) – “Истиқлол” (Тоҷикистон) – 1:4
“Олтин Асир” (Туркманистон) –“Олой” (Қирғизистон) – 4:1

Даври 6 31 май (чоршанбе)
“Истиқлол” (Тоҷикистон) – “Олтин Асир” (Туркманистон)
“Олой” (Қирғизистон) – “Дордой” (Қирғизистон)

Шаҳбози АСОМИДДИН, "ҶТ"