Тибқи нақшаи чорабиниҳои оммавӣ-варзишии Кумитаи ҷавонон, варзиш ва сайёҳии назди Ҳукумати Ҷумхурии Тоҷикистон ҳамасола дар гӯшаву канори мамлакат бо иштироки варзишгарони касбии варзиши сабук барои дарёфти Ҷоизаи варзишгари номдору шуҳратёр, устоди варзиши собиқ Иттиҳоди Шӯравӣ, мураббии шоистаи Ҷумхурии Тоҷикистон Шайдулло Исоев дар масофаҳои гуногун пойга баргузор карда мешавад.

Дар ҳошияи чорабиниҳои оммавӣ-варзишӣ бахшида бо Соли ҷавонон эълон гардидани соли 2017 17-умин Пойгаи ҷумхуриявӣ имсол дар шаҳри Кӯлоб доир гардид. Зимни ифтитоҳи ин тадбири варзишӣ намояндагони Кумитаи ҷавонон, варзиш ва сайёҳӣ, роҳбарияти мақомоти маҳаллӣ, собиқадорон ва варзишгарону ҳамкасбони Шайдулло Исоев суханронӣ намуда, барои ноил гардидан ба чунин муваффақиятҳо, муаррифии давлату миллати тоҷик дар арсаи байналмилалӣ ва тарбия намудани чандин шогирдон дар риштаи варзиши сабук ба ӯ изҳори миннатдорӣ намуданд.

Сипас бо иштироки варзишгарони синну соли гуногун ба пойга ҳусни оғоз бахшида шуд, аввалан дар масофаи 4 километр духтарон, дар масофаи 6 километр писарону духтарон ва собиқадорон, дар масофаи 8 километр ҷавонон ва дар масофаи 12 километр варзишгарони касбӣ ба дав шурӯъ карданд. Пойгаи мазкурро доварони дараҷаи ҷумҳуриявӣ ҳакамӣ карда, аз ҷониби Федератсияи варзиши сабук беҳтарин варзишгарон ба дастаи яккачини мамлакат сафарбар гардиданд. Худи Шайдулло Исоев иброз медорад, ки варзиши сабук шоҳи тамоми варзиши рӯи олам аст, зеро барои тамоми варзишгарон машқу тамрин маҳз аз дав шурӯъ мешавад. Бо миннатдорӣ аз сиёсати пешгирифтаи роҳбарияти олии кишвар махсусан Пешвои миллат муҳтарам Эмомалӣ Раҳмон барои ташкилу роҳандозии чунин мусобиқаҳо, фароҳам овардани шароити мусоид ва тарбияи дурусти насли наврас барои ноил гардидан ба муваффақияту музаффарият иброз гардид, ки минбаъд низ чунин мусобиқаҳо пайваста ташкилу роҳандозӣ мегардад.

Ғолибон дар масофаҳои гуногун миёни наврасону ҷавонон, варзишгарони касбӣ ва собиқадорон муайян ва аз тарафи Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон бо медалу диплом ва тӯҳфаҳои таъсиснамудаи дигар дастандаркорон сарфароз гардонида шуданд. Дар пойгаи мазкур бештар варзишгарони шаҳри Душанбе, Турсунзода ноҳияи Мӯъминобод ва вилояти Суғд ба гирифтани ҷойҳои ифтихорӣ мушарраф гардиданд. Ҳамчунин, барои иштироки фаъолона ба донишҷӯёни Коллеҷи милитсияи шаҳри Кӯлоб ва дастаи таъиноти махсуси ВКД дар шаҳри Кӯлоб ифтихорнома ва тӯхфаҳо тақдим карда шуд.