Солҳои охир зери дастгириҳои Ҳукумати кишвар дар соҳаи варзиш футбол дар минтақаҳо рушд ёфта, ҷалби наврасону ҷавонон зиёд ва дастаҳои ҷадид ба фаъолият шурӯъ намудаанд. Аз ҷумла дар вилояти Суғд низ рушди ин соҳа зиёд ба назар мерасад.

Таваҷҷуҳ ба соҳаи варзиш ва ташвиқу тарғиби тарзи ҳаёти солим яке аз самтҳои муҳимтарини фаъолияти Мақомоти иҷроияи ҳокимияти давлатии вилояти Суғд маҳсуб меёбад. Дар ин замина сол аз сол футбол дар вилоят рушд карда, футболбозони вилоят дар мусобиқоти дохиливу берун аз кишвар ба дастовардҳои назаррас ноил мегарданд.

Оид ба фаъолияти имрӯзаи дастаҳои футболи вилоят котиби генералии Федератсияи футболи Суғд Аҳлидин Юнусов иброз дошт, солҳои охир бо дастгирии мақомоти давлатӣ бо мақсади иҷрои босамари Барномаи рушди футбол шароити варзишӣ беҳтар гардида, ФФС дар якҷоягӣ бо дастаҳои футбол нақшаву вазифаҳои дар пеш гузоштаашро дар амал татбиқ намуда истодааст.

- Айни замон аз вилояти Суғд се даста дар лигаи олӣ “Хуҷанд”, “Эсхата”, “Истаравшан” ва се даста дар Лигаи якум “Пахтакор”, “Исфара”, “Равшан” баромад намуда, инчунин соли равон 9 даста дар Лигаи дуюми минтақаи Суғд баромад хоҳанд кард,- иброз дошт, ҳамсуҳбати мо.

Бояд гуфт, ки дар вилоят ба рушди футболи бонувон низ аҳмияти хос зоҳир гардида, чанде аз дастаҳои футболи духатарона ба муваффақиятҳо ноил гардидаанд. Аз ҷумла, соли сипаришуда дастаи “Мастчоҳ” дар чемпионати Тоҷикистон байни дастаҳои духтаронаи то 15 сола ва дастаи “Мактаби махсуси вилоятӣ” дар ин самт байни 17 - солаҳо зинаи дуюмро касб намудаанд.

Аҳлиддин Юнусов камбудиҳоро дар самти рушди футбол бештар миёни дастаҳои духтарона ва наврасон арзёбӣ намуда, иброз медорад, ки теъдоди дастаҳо дар ин замина кам буда, баъзе аз шаҳру ноҳияҳо тамоман даста надоранд.

Аммо бо вуҷуди ин тайи ду соли охир дастовардҳои дастаҳои кӯдакону наврасони вилоят зиёд намоён гардидааст. Дар давоми соли 2020 дар Чемпионати Тоҷикистон байни наврасони U-15 ва U-17 дастаҳои навраси вилоят ҷойи дуюми ифтихориро соҳиб гардидаанд. Дар мусобиқаи ҷумҳуриявии Ҷоми “Умед” то 17 - солаҳо дастаи “Кимиё” -и шаҳри Исфара ғолиби ин мусобиқа гардид. Ҳамзамон дар мусобиқаи “Тӯби чармин 2020” мактаббачагони Гимназияи шаҳри Панҷакент сазовори мақоми аввал ва аз шаҳри Истаравшан ҷои дуюмро ишғол намуданд.

Ёдовар мешавем, ки футболбозони вилоят дар мусобиқаҳои берун аз кишвар низ баромад намуда, сазовори ҷойҳои намоён гардидаанд. Аз ҷумла, соли 2018 дастаи то 12 - солаҳои вилоят дар мусобиқаи минтақаи Осиёи Миёна, ки дар Ҷумҳурии Қирғизистон баргузор гардида буд, ғолиб омада, Ҷоми водии Фарғонаро ба даст оварда буданд. Инчунин 18 - 23 апрели соли равон дар мусобиқаи кушоди байналмилалии “MINORAL-CALON CUP” оид ба футбол байни наврасони таваллудашон 2008, ки дар шаҳри Бухорои Ӯзбекистон доир гардид, наврасони шаҳри Истаравшан бо маҳорати олии худ дар миёни 12 даста ғолиб ва соҳиби Ҷоми мусобиқаи байналмилалии “MINORAL-CALON CUP” гардиданд.

Тавре Асрор Шораҷабов, мураббии дастаи наврасони Истаравшан мегӯяд, барои дастгирии варзишгарони наврас аз ҷониби соҳибкорону мақомотҳои марбута пайваста иқдомҳои хуб роҳандозӣ гардида, худи имсол ду варзишгоҳи болопӯшида, ройгон барояшон тақдим гардидааст.

Федератсияи футболи Суғд низ айни замон дастаҳоро дар мусобиқоти байналмилалии дарпешистода, ки дар кишвари Қазоқистон баргузор мегардад, тайёр менамояд.

Исфандиёр АМАКҶОНОВ, "ҶТ"