Маросими ҷоизасупорӣ ба варзишгарони Вилояти Мухтори Кӯҳистони Бадахшон бо иштироки   иҷрокунандаи  вазифаи раиси вилоят Ёдгор Файзов баргузор гардид.

Маросими мазкур дар толори Мақомоти иҷроияи ҳокимияти давлатии ВМКБ доир гардида, ба 95 нафар варзишгарони вилоят ва мураббиён Ҷоиза, сипосномаю ифтихорнома ва маблағҳои пулӣ тақим гардид.

Ба иттилои АМИТ «Ховар»  дар маросими ҷоизасупорӣ раисони шаҳру ноҳияҳои вилоят, мураббиён ва варзишгарони вилоят, собиқадорони варзиш, соҳибкорон ва намояндагони ташкилоту муассисаҳо ширкат варзиданд.

-Мояи ифтихор аст, ки тавассути сиёсати варзишпарваронаи Пешвои миллат муҳтарам Эмомалӣ Раҳмон соҳаи варзиш рушду нумӯъ карда, варзишгарони тоҷик ба музаффариятҳои пай дар пай ноил мегарданд. Рушди ҳамаҷонибаи варзиш, обутоби ҷисмонии ҷавонон, хосса наврасону ҷавонон, фароҳам овардани шароити мусоид барои ривоҷ ёфтани ҳамаи намудҳои тарбияи ҷисмонӣ дар меҳвари таваҷҷуҳи мақомоти иҷроияи ҳокимияти давлатии вилоят қарор дошта, дар даврони соҳибистиқлолии кишвар дар шаҳру ноҳияҳои вилоят даҳҳо адад варзишгоҳҳо ва майдончаҳои нави варзишӣ ташкил карда шуданд,- гуфт зимни баромади хеш иҷрокунандаи  вазифаи раиси вилоят Ёдгор Файзов

Буфта мешавад, ки соли 2019 аз ҷониби Раиси Федератсияи футболи Тоҷикистон Рустами Эмомалӣ дар шаҳри Хоруғ боз панҷ майдончаи зебою замонавии варзишӣ бунёд карда мешаванд.

Ба иттилои масъулини соҳаи варзиши ВМКБ, ҳоло дар вилоят 62 иншооти соҳа  ва 10 мактаби варзишӣ фаъолият доранд. Соли 2018 варзишгарони вилоят дар 262 мусобиқаи ҷумҳуриявию байналмилалӣ ширкати фаъолона намуда, сазовори 65 медали тилло  шуданд.