Аз 18 август то 2 сентябр соли ҷорӣ дар Ҷумҳурии Индонезия 18-умин бозиҳои тобистонаи Осиё доир шуд. Дар он 81 нафар варзишгарони кишвар дар 16 намуди варзиш ширкат варзида, сазовори 7 медал (4 нуқра, 3 биринҷӣ) гардиданд. Дар ҳайати гирандагони мақомҳои ифтихории мусобиқа номи Шаҳриёр Даминов низ навишта шуд. Шаҳриёр дар мусобиқа оид ба қаиқронӣ, дар намуди байдаркаи якнафара ширкат намуда, дар масофаи 1000 метр медали нуқраи бозиҳоро ба даст овард. Ин ягона варзишгарест, ки дар даврони соҳибистиқлолӣ дар риштаи қайиқронӣ дастовардҳои назаррасро соҳиб шудааст. Инчунин ин варзишгар соли 2015 дар шаҳри Палембанги Индонезия дар намуди каноэи якнафара байни ҷавонон ба масофаи 200 метр мақоми аввалро ишғол карда, қаҳрамони Осиё шудааст ва соли 2017 дар шаҳри Шанхайи Ҷумҳурии Мардумии Чин медали нуқраи чемпионати Осиёро соҳиб шудааст. Доир ба фаъолияти варзишӣ, ҷодаи интихоб карда, нозукиҳои варзиши қайиқронӣ бо Шаҳриёр Даминов суҳбат оростем:

- Нахуст тамринро аз футбол шуруъ намудед ва баъди чанд вақт ба риштаи қайиқронӣ гузаштед, интихоби худи Шумо буд ё каси дигар?

- Аз хурдсолӣ, ки ба варзиш шавқу ҳаваси зиёд доштам, дар синни 14 солагӣ бо кӯдаконӣ маҳалла барои тамрини футбол ба Варзишгоҳи марказии шаҳри Душанбе мерафтем. Дар ҳамсоягиамон Зоҳир Набиев, мураббӣ оид ба қайиқронӣ зиндагӣ мекард. Бо хоҳиши волидайн ба ин намуди варзиш рӯ овардам ва то имрӯз таҳти роҳбарии ин мураббӣ тамрин карда истодаам. Аввалҳо барои қонеъ намудани шавқу рағбати кӯдакӣ ба тамрин мерафтам ва оҳиста-оҳиста ин намуди варзиш ба дилам ҷой гирифт. Нахустин маротиба дар намуди байдарка, ки чанд нафар менишинанд, тамринро шуруъ намуда, дар кӯтоҳтарин муддат нозукиҳои ин намуди варзишро аз худ кардам. Аз сабабе, ки ман бо дасти чап ҳаракат менамудам, мураббиам маро аз байдарка ба намуди каноэ гузаронид. Ва дар каноэ як ҳафта таёрӣ дида, дар мусобиқаи ҷумҳуриявӣ ширкат намудем. Дар мусобиқаи мазкур аз намуди каноэ, мақоми якумро сазовор шудам, ки ин оғози ғалабаҳоям ба ҳисоб меравад. Пас аз ин ғолибият ба хотири баланд бардоштани парчами ватани азиз ва муаррифӣ намудани миллати тоҷик дар мусобиқаҳои ҷаҳонӣ ба тамрин ҷиддӣ машғул шудам.

- Дар даврони соҳибистиқлолӣ дар соҳаи қайиқронӣ ягона нафаре мебошед, ки унвони қаҳрамони Осиё ва дигар ҷоизаҳои байналмилалиро ба даст овардаед, муваффақияти хешро дар чӣ мебинед?

- Рости вақте якумин ҷоизаи ин соҳаро ба даст овардам, дар пешам мақсад гузоштам, ки то қуллаҳои баландтарини ин риштаи варзиш талош меварзам. Муваффақияти хешро аввалан аз дастгирӣ ва ғамхориҳои бевоситаи Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон мебинам. Зеро Роҳбари давлат ҳамеша барои варзишгарон имкониятҳои зиёдро фароҳам меоранд. Ҳамчунин дар комёбиам саҳми мураббиёнам низ бисёр калон аст.

- Тамринҳои худро дар куҷо мегузаронед? Дар кишвар шароит барои тамрини Шумо муҳайёст?

- Тамринҳоямонро дар “Кӯли ҷавонон” гузаронида истодаем. Ва ин кӯл барои машқҳои умумӣ истифода мешавад. Аммо барои тайёр шудан дар мусобиқаҳои сатҳи байналмилалӣ он ба стандартҳо ҷавобгӯ нест. Мо тамринҳоро пеш аз мусобиқаҳои ҷаҳонӣ дар дарёи Вахш, Норак ва Искандаркӯл баргузор менамоем. Масалан пеш аз Бозиҳои осиёӣ мо машғулиятҳоро дар Искандаркӯл доир намудем ва дар ин мусобиқа то як андоза омода шудем.

Дар умум гирем шароити қайиқронӣ дар кишвар дар сатҳи паст қарор дорад, зеро имрӯз мо аз надоштани бошгоҳ танқисӣ мекашем. Бачаҳо аз набудани утоқҳои либосивазкунӣ, ҳоҷатхона ва кӯлҳои махсус душворӣ мекашанд. Барои рушди ин намуди варзиш дар Тоҷикистон ва омода намудани варзишгарони касбӣ як кӯли ба талаботи мусобиқаҳои байналмилалӣ ҷавобгӯ бунёд гардад, ман фикр мекунам варзишгарони мо аз тамоми мусобиқаҳо бо дастовард ба Ватан бармегарданд.

- Ҳафтсол мешавад, Шумо дар мусобиқаҳои байналмилалӣ аз номи Тоҷикистон баромад менамоед, варзишгарони тоҷикро чӣ гуна мешиносанд?

- Аз соли 2011 дар мусобиқаҳои берун аз кишвар ширкат менамоям ва дар ин мусобиқаҳо бисёр марҳилаҳоро аз сар гузаронидам. Вақте ки мо он солҳо дар мусобиқаҳои байналмилалӣ ширкат менамудем, варзишгарони хориҷ моро рақиб ҳисоб намекарданд. Албатта дар даврони Иттиҳоди Шӯравӣ дар ин ришта варзишгари пурқувват ба мисли Иброҳим Ҳасанов доштем, пас аз ин дар даврони соҳибистиқлолӣ дастоварди назаррас набуд, аз ин ҷиҳат моро чандон эътироф намекарданд. Пас аз соҳиб шудани дастовардҳои байналмилалӣ, қайиқронони ҷаҳон имрӯзҳо моро яке аз ҳарифони ҷиддӣ дар мусобиқаҳо меҳисобанд. Ин албатта бароямон ифтихор аст.

- Баъзан ба назар мерасад, ки дар мусобиқаҳои байналмилалӣ нисбати варзишгарон ноадолатиҳо мешавад. Ин ҳолат албатта ба рӯҳияи варзишгарон бетаъсир намемонад. Мураббиёни тоҷик дар мусобиқаҳои байналмилалӣ то кадом андоза аз варзишгарони тоҷик дифо мекунанд?

- Нақши довар дар мусобиқаҳои гуногуни варзишӣ бисёр калон аст. Мо мушоҳида менамоем, ки дар баъзе рақобатҳо ноадолатии доварон ба назар мерасад ва умеди як варзишгар барбод меравад. Дар соҳаи мо довар наонқадар нақш мебозад, зеро мо дар масофаи 1000 метр рақобат кунем, ин вобаста аз маҳорату малакаи варзишгар мебошад. Вақте дар финиш наздик мешавем, тавассути компютер аксбардорӣ мегардад ва инро фотофиниш мегӯянд, ки дар ин ҷо нашқи асосиро компютер мебозад. Зимнан бояд гуфт, ки айни ҳол мо дар ҷумҳурӣ мураббиёни сатҳи ҷаҳонӣ кам дорем. Аз ин сабаб баъзан вақт варзишгарони мо дар мусобиқаҳои байналмилалӣ ба ноадолати рӯ ба рӯ мегарданд.

- Федератсияи қайиқронии кишвар барои рушди ин соҳа чӣ корҳоро анҷом дода истодааст?

- Федератсия то ҳадди имкон барои варзишгарон кӯмак намуда истодааст. Ҳамасола як ё ду нафар варзишгаронро ба мусобиқаҳои байналмилалӣ равон мекунад. Боварӣ дорем, дар наздиктарин вақт ҳамаи мушкилиҳои федератсия бартараф гардида, ҳайаташро бо варзишгарони касбӣ комил мегардонад.

- Дар ҳоли ҳозир ба кадом мусобиқа омодагӣ дида истодаед?

- Айни ҳол барои Чемпионати Осиё миёни ҷавонон, ки 18 октябр дар Ҷумҳурии Ӯзбекистон баргузор мегардад, омодагӣ мебинем. Машқҳои тамриниву таълимиро бо устодон Зоҳир Набиев ва Витали Сарокин дар “Кӯли ҷавонон” гузаронида истодаем. Зоҳир Набиев дастаро омода менамояд ва Витали Сарокин мураббии инфиродиям мебошад.

- Ҳаст орзуе, ки то имрӯз бароятон амалӣ нашудааст?

- Ягона орзуям ин баланд бардоштани Парчами давлатӣ дар бозиҳои тобистонаи олимпӣ мебошад. То бозиҳои олимпӣ ду соли дигар мондааст ва барои роҳхат гирифтан ба Олимпиадаи 2020, ки дар Токио баргузор мегардад, талош мекунам.

- Ба ҷавонони кишвар чӣ гуфтаниед?

- Ба ҷавонони кишвар ҳаминро гуфтаниям, ки ҳамеша ба варзиш машғул гарданд, зеро номи миллати тоҷик имрӯз ба воситаи варзишгаронаш дар забонҳои тамоми мардуми ҷаҳон тоб мехӯрад.

- Барои суҳбат ташаккур. Ба Шумо бурдборию комёбиҳои назаррас таманно мекунем.