Дар шаҳри Душанбе 22 июл мусобиқаи “Шоми бокс” баргузор мегардад. Дар ин бора Федератсияи бокси Тоҷикисон иттилоъ медиҳад.

Ба иттилои манбаъ мусобиқаи мазкур дар Қасри теннис ва маҷмааи варзишҳои обӣ миёни муштзанони касбӣ доир хоҳад шуд.

Гуфта мешавад, ки дар ин мусобиқа варзишгари тоҷик Баҳодур Усмонов бо намояндаи Камерун Кристофер Муафо рақобат хоҳад кард. Ин мубориза аз 10 қисм (раунд) иборат буда, ҳарду муштзан барои ба даст овардани камарбанди “WBO Intercontinental” талош хоҳанд кард.

Давлат Болтаев, муштзани маъруфи тоҷик дорандаи медали биринҷии Бозиҳои олипии Париж-2024 бошад дар “Шоми бокс”- и Душанбе бо Соломон Адебайо аз Нигерия дар 8 раунд барои ба даст овардани унвони “IBA.PRO Intercontinental” қувваозмоӣ мекунанд.

Ҳамчунин, дар мусобиқаи мазкур Вадим Мусоеви рус барои камарбанди “IBA.PRO Intercontinental” бо Хосе Мигел аз Мексика мубориза мебарад.

Ёдовар мешавем, ки охирин мусобиқаи “Шоми бокс” дар Душанбе моҳи майи соли равон баргузор гашта буд.

Сайёраи ҚИЁМИДДИН, “ҶТ”