Владимир Ғуломҳайдаров, 26 феврали соли 1946 дар шаҳри Душанбе дар оилаи коргар ба дунё омадааст. Ӯро ситораи футболи тоҷик низ мегӯянд. Аввалин маротиба Ғуломҳайдаров назди мураббии шоиста В. Борисенко ба тамрин оғоз бахшида буд. Ӯ аввалин футболбозони тоҷик аст, ки ба дастаи мунтахаби ИҶШС роҳ ёфтааст.

Соли 1964 Ғуломҳайдаров аввалин маротиба дар ҳайати дастаи “Помир”-и Душанбе баромад намудааст. Ӯ ҳамчунин дар як вохӯрии даставие, ки бо СКА-и Новосибирск баргузор гардида буд, иштирок намуд ва маҳорати олӣ нишон дод. Баъди анҷоми бозӣ ӯро соли 1968 ба дастаи мунтахаби ИҶШС даъват намуданд. Владимир Ғуломҳайдаров дар пироҳани сурх бо ҳарфҳои “ИҶШС” дар ду мавсим таҳти роҳбарии мураббиёни футболи шӯравӣ Качалин ва сипас Гуляев бозӣ кард. Дар ҳашт бозие, ки Ғуломҳайдаров дар ҳайати мунтахаби ИҶШС анҷом дод, ба задани се гол мушарраф шуда, шарафи миллати тоҷикро боло бурд. Ғуломҳайдаров яке аз беҳтаринҳое буд, ки бо ситораҳои футболи шӯравӣ, ба мисли Эдуард Стрелтсов ва Игор Нетто паҳлу ба паҳлу бозӣ намудааст.

Дар ҳар як бозие, ки Владимир иштирок менамуд, ӯро боз ҳам бештар шуҳратманд месохт, зеро ҳар як голи ба ҳадаф расонидааш таъминкунандаи ғолибияти даста буд. Солҳои 1969 - 1970, ки мавсими пурҷӯши футбол буд, Ғуломҳайдаровро ба “Торпедо” –и Москав, ки дар лигаи олӣ бозӣ менамуд, гузарониданд. Ӯ дар ин давом дар 19 бозӣ иштирок намуда, ба задани се гол даст ёфт.

Соли 1971 дубора ба “Помир” баргашт ва дар лигаи аввал бозӣ намуд. Дар ин муддат Ғуломҳайдаров ба натиҷаҳои баланд соҳиб гардид ва яке аз нишонзанҳои беҳтарин шинохта шуда буд. Тӯли солҳои 1972- 1977 ӯро беҳтарин нишонзан дар “Помир”-и Душанбе медонистанд.

Воқеан, барои таърихи футболи тоҷик фаъолияти пуршарафи Ғуломҳайдаров, ки дар дастаҳои “Торпедо”-и Маскав ва дар ҳайати мунтахаби ИҶШС бозӣ кардааст, ифтихори бузург аст.

Соли 1978 Ғуломҳайдаров ба ҳайси ёвари сармураббии “Помир” ба кор шурӯъ намуд. Аз моҳи июли соли 1981 ба ҳайси сармураббии даста таъин гардид ва пас аз ду сол Юрий Сёмин дар ин вазифа ӯро иваз намуд. Ғуломҳайдаров дар ин муддат роҳбарии дастаи хоҷагии “Вахш”-ро ба даст гирифта, то соли 1991 онҳоро роҳбарӣ намуд. Аз соли 1992 боз дар ҳайати “Помир” ба ҳайси мураббӣ фаъолият намуд. Соли 1994 Владимир Ғуломҳайдаров як муддат сармураббии мунтахаби Тоҷикистон низ буд.

Дар миёнаи солҳои 90-ум Ғуломҳайдаров ба Қазоқистон рафт. Аз соли 1999 дар дастаи “Ғайрат”-и Алмаато ба ҳайси ёрдамчии сармураббӣ фаъолияташро идома дод. Ҳамзамон, соли 2003 ба ҳайси сармураббии ҳамин даста ва аз моҳи июни ҳамон сол ба вазифаи сармураббии дастаи “Тироз” интихоб шуд. Дар охири мавсим Ғуломҳайдаров дубора ба “Ғайрат” омада, он ҷо солҳои 2004-2005 боз ба ҳайси мураббии даста корро оғоз намуд. Ҳамин тавр, соли 2006 дар дастаи “Жетису” ба ҳайси мураббӣ-мушовир ва дигар вазифаҳо кор кардааст.

Владимир Ғуломҳайдаров моҳи октябри соли 1999, замоне дар Алмаато қарор дошт, дар бозии дастаҳои мунтахаби собиқадорони ИҶШС ва Олмон ширкат варзида, ба задани гол низ мушарраф гардидааст.
Маврид ба зикр аст, ки Владимир Ғуломҳайдаров дар таърихи футболи тоҷик натанҳо маҳорати олии футболбозӣ нишон додааст, балки яке аз ташаббускороне мебошад, ки соли 1980 маҳз бо ташаббус ва роҳбарии ӯ дастаи ҷавонони Тоҷикистон соҳиби Ҷоми мусобиқаи умумииттифоқии “Кроссинг” шуд ва бори аввал қаҳрамони Иттиҳоди Шӯравӣ гар¬дид.

Қ. МАҲМАДҶОНОВ, “ҶТ”