1-уми феврал дар толори қабули расмии мақомоти иҷроияи ҳокимияти давлатии вилояти Суғд маросими қадрдонии варзишгарону муррабиёне, ки дар соли 2021 соҳиби нишондиҳандаҳои назаррас шудаанд, доир гардид.

Раҷаббой Аҳмадзода, раиси вилояти Суғд зимни суҳбат бо варзишгарону муррабиён иброз дошт, ки дар даврони Истиқлоли давлатии Ҷумҳурии Тоҷикистон маҳз бо дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати дастгирии ҷавонон ва варзишгарон аз ҷониби давлату ҳукумат заминаҳои мусоид фароҳам оварда шуданд.

-Боиси ифтихор аст, ки бо ҳидоятҳои Президенти Ҷумҳурии Тоҷикистон муҳтарам Эмомалӣ Раҳмон дар соли 2021 таваҷҷуҳ ба ҷавонон ва варзишгарон чун ҳарвақта назаррас буд. Ин ташаббус аз ғамхориву дастгирӣ ва боварии роҳбари олии кишвар ба ин қишри фардосози ҷомеа шаҳодат медиҳад ва масъулияти ҷавонон ва варзишгаронро дар назди миллату давлат дучанд мегардонад,-таъкид кард раиси вилоят.

Гуфта шуд, ки давоми соли 2021 дар шаҳру ноҳияҳои вилоят 67 иншооти варзишӣ, аз ҷумла 1 варзишгоҳ, 49 майдонча, 15 толор, 1 ҳавзаи шиноварӣ ва 1 маҷмааи варзишӣ бо сарфи беш аз 37,5 миллион сомонӣ аз ҳисоби маблағҳои буҷетӣ ва дигар сарчашмаҳо сохта, мавриди ба истифода қарор гирифтааст.
Тибқи нақшаи тақвими ягонаи чорабиниҳои варзишӣ барои соли 2021-ум 104 мусобиқаву чемпионати вилоятӣ ташкил ва баргузор гардид, ки дар онҳо беш аз 8 ҳазору 750 нафар варзишгарони вилоят, аз ҷумла 2 ҳазору 130 нафар духтарон, инчунин дар 137 мусобиқаи ҷумҳуриявӣ ва байналмилалӣ 3982 варзишгар, аз ҷумла 763 нафар бонувон иштирок намуда, ба гирифтани 815 медали тилло, 717 медали нуқра ва 921 медали биринҷӣ сазовор гардиданд.

Ҳамзамон, варзишгарони вилоят Комроншоҳи Устопириён дар чемпионати Осиё ва Гранд слем оид ба намуди гӯштини дзюдо ҷойҳои дуюм ва сеюм, Абдураҳим Ёқубов, Муҳаммад Ҷабборов, Искандарбек Рустамов ва Бибиҷон Музаффарова оид ба бокс байни наврасон ва ҷавонон ҷойҳои сеюм, Мавзуна Азимова дар мусобиқаи байналмилалӣ ва Гран-при оид ба камонварӣ ҷойи сеюм, Амирҷон Бобоҷонов ва Абдусаттор Ғафуров дар мусобиқаи байналмилалӣ оид ба қаиқронӣ ҷойҳои дуюм ва сеюм, Ҳамроз Раҷабов дар Чемпионати Осиё оид ба гӯштини самбо ҷойи якум, Илҳом Турсунов ва Наимҷон Ҳабибуллоев дар Чемпионати Осиё оид ба дастхобонӣ байни варзишгарони имконияташон маҳдуд ҷойҳои якум ва дуюм, Фотима Гадоева дар Чемпионати ҷаҳон оид ба ҷиу-ҷитсу байни ҷавонон ҷойи дуюм, Беҳрӯз Гулмаҳмадзода, Кароматулло Қурбонов, Меҳроҷ Рабиев ва Шероз Очилов дар Чемпионати ҷаҳон оид ба гӯштини камарбандӣ ҷойи сеюмро сазовор гардида, Парчами давлатии Тоҷикистони азизро дар толору майдонҳои бузурги ҷаҳон парафшон карданд.

Дар охир ба ғолибону ҷоизадорон ва устодону муррабиёни онҳо Сипоснома ва мукофотпулии раиси вилоят супорида шуд.