Сомон Маҳмадбеков, ҷудокори номошнои меҳан имрӯз дар Бозиҳои Осиёии Ҳангжоу аз худ маҳорати фавқулода нишон дода, дар вазни зери 81 кг то ба даври ниҳоӣ расид ва дар ин давр ӯро ҷудокори Кореяи Ҷанубӣ Ли Ҷунван дар татами пешвоз хоҳад гирифт.

Бояд гуфт, ки Сомон таърихсозӣ кард ва аввалин ҷудокор дар таърихи ҷудои тоҷик шуд, ки ба финали Бозиҳои Осиёӣ роҳ ёфт.

Сомон дар даври аввал бо ду имтиёзи вазарӣ бар Муаяд Звайб аз Фаластин пирӯз шуда, ба даври чаҳорякниҳоӣ роҳ ёфт. Дар даври чаҳорякниҳоӣ Сомон бо имтиёзи иппон бар Асад Масабирови қирғиз ғалаба карда, ба даври ниманиҳоии Бозиҳои Осиёии Ҳангжоу баромад.

Дар даври ниманиҳоӣ Сомон тавонист, ки бо як ҷасорату матонати ба худ хос бар Абулайхан Жубаназари қазоқ бо имтиёзи вазарӣ ғалаба карда, ба финал роҳ ёбад.

Ҳамакнун, пас аз нисфирӯзии имрӯз Сомон дар финал бо Ли Ҷунван аз Кореяи Ҷанубӣ гӯштин мегирад.

Варзишгари дигари кишвар Беҳрӯз Хоҷазода бошад, имрӯз дар риштаи ҷудо зери вазни то 73 кг дар Бозиҳои Осиёии Ҳангжоу наздик буд, то ба даври ниҳоӣ роҳ ёбад, лек ҷудокори ботаҷрибаи ҷопонӣ Соичи Ҳошимото садди роҳаш шуд.

Беҳрӯз Хоҷазода дар даври аввали Бозиҳои Осиёи Ҳангжоу бар ҷудокори Филиппин - Накано Кейсей бо имтиёзи иппон ғалаба карда, ба даври чаҳорякниҳоӣ баромад. Дар даври чаҳорякниҳоӣ Хоҷазода бар Данияр Шамшаеви қазоқ бо имтиёзи вазарӣ зафар ёфта, дар даври ниманиҳоӣ бо Соичи Ҳашимотои ҷопонӣ гӯштин гирифт. Дар даври ниманиҳоӣ Хоҷазода аз ҳарифи ҷопониаш бо як имтиёзи вазарӣ мағлуб шуда, нисфирӯзии имрӯз барои нишони биринҷӣ рақобатро идома медиҳад.

Ёдовар мешавем, ки Бозиҳои Осиёии Ҳангжоу аз 23-юми сентябр то 8-уми октябр баргузор мешавад. Дар ин мусобиқаи бонуфузи Осиёӣ 481 маҷмӯи медалҳо аз рӯи 40 намуди варзиш ба роҳ монда шудааст. 138 варзишгар аз Тоҷикистон аз 18 риштаи варзиш дар ин мусобиқа баромад мекунанд.

Я. МАҲМАДНАБИЕВ, “ҶТ”