Бо ду қарори вижаи Раиси шаҳри Душанбе Рустами Эмомалӣ 14 апрели соли равон “Барномаи рушди футбол дар шаҳри Душанбе барои солҳои 2022 – 2026” ва “Барномаи рушди тарбияи ҷисмонӣ ва варзиш дар шаҳри Душанбе барои солҳои 2022-2026” тасдиқ гардид. Дар ин бора аз шуъбаи иттилоотии дастгоҳи Раиси шаҳри Душанбе хабар додаанд.

Барномаҳои мазкур бо мақсади мукаммалгардонии соҳаи тарбияи ҷисмонӣ, рушду инкишоф ва таъмини оммавияти варзиш ҳамчун самти афзалиятноки сиёсати иҷтимоии кишвар, инчунин баҳри ташаккули шахсияти солим, ҳифзу беҳдошти саломатии сокинони пойтахт ва таъмини варзишгарони шаҳри Душанбе дар мусобиқаҳои ҷумҳуриявию байналмилалӣ, фароҳам овардани шароити мусоид ҷиҳати рушди футбол, мукаммалгардонии инфрасохтори соҳа ва таъмини оммавияти варзиш роҳандозӣ гардидааст.

Мувофиқи қарорҳои мазкур, Раёсати кор бо ҷавонон ва варзиши шаҳри Душанбе ҳамоҳангсози амалисозии барнома буда, вазифадор гардидааст, ки ҳар сол то 10 январ ба мақомоти иҷроияи ҳокимияти давлатии шаҳри Душанбе ва Кумитаи кор бо ҷавонон ва варзиши назди Ҳукумати Ҷумҳурии Тоҷикистон доир ба корҳои анҷомдода гузориш пешниҳод намояд.