Дар мусобиқаи байналмилалии ҷудо – “Dushanbe Grand Slam - 2024”, ки рӯзҳои 3-5-уми май дар Қасри теннис ва маҷмааи варзишҳои обии шаҳри Душанбе доир мегардад султони ҷудо ҷаҳон - Тедди Ринер иштирок хоҳад кард.

Дар ин бора сомонаи расмии Федератсияи байналмилалии ҷудо (IJF) хабар медиҳад.

Ба иттилои манбаъ, барои иштирок дар мусобиқаи “Dushanbe Grand Slam- 2024” то ҳоло 446 варзишгар (242 мард ва 204 зан) аз 72 кишвари панҷ қораи ҷаҳон номнавис шудаанд.

Ҳамакнун пеш аз Бозиҳои олимпии Париж - 2024 барои ширкат дар мусобиқаи “Dushanbe Grand Slam - 2024” беҳтаринҳои ҷудои ҷаҳон ба Душанбе меоянд ва барои дарёфти ҷоизаҳо ва имтиёзҳои олимпӣ талош мекунанд.

Дар байни онҳо дурахшонтарин ситораи ҷудои дунё Тедди Ринери 35-солаи фаронсавӣ дар вазни беш аз 100 кило (қадаш 2 метру 4 сантиметр) рақобат хоҳад кард.

Ин паҳлавони машҳур қаҳрамони секаратаи олимпӣ (Лондон-2012, Рио-2016, Токио-2020), қаҳрамони 12-каратаи ҷаҳон (бори охирин дар Доҳа-2020), қаҳрамони 5-каратаи Аврупо (бори охирин дар Қазон-2016) ва қаҳрамони бисёркаратаи Фаронса мебошад.

Баробари иштироки даҳҳо ситораи олами ҷудо дар “Dushanbe Grand Slam - 2024”, инчунин қарор аст, Шоҳе Оно ҷудокори ҷопонӣ низ ҳамчун меҳмони фахрӣ иштирок кунад.

Яҳё МАҲМАДНАБИЕВ, “ҶТ”