Чанде пеш дар шаҳр Қӯрғонтеппа бахшида ба “Соли ҷавонон” ва Рӯзи ҷавонони Тоҷикистон чорабинии варзишӣ бо мақсади оммавӣ гардонидани навъи варзиши дучархаронӣ байни хонандагони маактабҳои шаҳр мусобиқаи веломарафон таҳти унвони “Варзиш – пайки дӯстӣ” доир гардид.

Сардори Раёсати ҷавонон, варзиш ва сайёҳии вилояти Хатлон Фариза Абдуллоева дар он иштирок намуда, иброз намуд, ки “Эълон гардидани соли 2017 ҳамчун “Соли ҷавонон” аз ҷониби роҳбарияти олии мамлакат ҷавононро рӯҳбаланд намуда, онҳоро боз ҳам барои пешрафту шукуфоӣ ва саҳм гузоштан дар ободонию созандагии ватани азизамон водор месозад”.

Мусобиқаи мазкур бо иштироки доираи васеи варзишгарон гузаронида шуда, иштирокчиён аз бозори тиҷоратии “Ҳоҷӣ Шариф”, то назди Театри вилоятии мусиқӣ-мазҳакавии ба номи Ато Муҳаммадҷонови шаҳри Қӯрғонтеппа сабқат оростанд.

Пас аз анҷоми мусобиқаи варзишӣ дар назди театри вилоятии мусиқӣ-мазҳакавии ба номи Ато Муҳаммадҷонови шаҳри Қӯрғонтеппа чорабинии фарҳангию фароғатии “Шоми ҷавонӣ” баргузор шуд. Ҳунармандони бахши фарҳанги шаҳр бо барномаи консертии омоданамудаи худ хотири ҳозиринро шод гардониданд.  

Умед Мирзоев, “ҶТ”