СУХАНИ ТАБРИКОТИИ РАИСИ КУМИТАИ КОР БО ҶАВОНОН ВА ВАРЗИШИ НАЗДИ ҲУКУМАТИ ҶУМҲУРИИ ТОҶИКИСТОН МУҲТАРАМ ГУЛАҲМАДЗОДА ЗУЛФИҚОР АҲМАД БА ИФТИХОРИ "РӮЗИ ВАРЗИШГАРОНИ ТОҶИКИСТОН"

Муҳтарам варзишгарону парчамбардорон,
Қаҳрамонсозону муаррифгарони давлату миллат,
Устодону собиқадорон ва мураббиёни соҳаи варзиш!

Боиси ифтихор ва шарафмандии мо масъулини соҳаи варзиш ва варзишгарони кишвар аст, ки дар остонаи ҷашни воқеан ҳам арзишманди миллӣ - Истиқлоли давлатӣ ҳамасола санаи 10 августро дар кишвар ҳамчун “Рӯзи варзишгарони Тоҷикистон” ҷашн мегирем.

Бо истифода аз фурсати муносиб Шумо ва тамоми мардуми шарафманди Тоҷикистони биҳиштосоро ба “Рӯзи варзишгарони Тоҷикистон” ва ҷашни бисёр ҳам азизу муқаддаси миллати тоҷик - Истиқлоли давлатӣ самимона таҳният мегӯям.
Пеш аз ҳама мехоҳам ёдовар шавам, ки таҷлили “Рӯзи варзишгарони Тоҷикистон” ба Бозиҳои тобистонаи олимпии Париж-2024 рост омадааст. Боиси фарҳмандиву нишот аст, ки дар ин бонуфузтарин мусобиқаи сатҳи байналмилалӣ 14 - нафар варзишгарони кишвар аз рӯи шаш намуди варзиш Тоҷикистони маҳбубро намояндагӣ доранд.

Хушбахтона ба варзишгарони номовари тоҷик Сомон Маҳмадбеков, Темур Раҳимов ва Давлат Болтаев муяссар гардид, ки аз риштаи намуди варзиши ҷудо ва бокс дар Бозиҳои тобистонаи олимпии Париж-2024 иштирок карда, сазовори ҷойҳои сеюм ва ба хазинаи варзишии кишвар медали биринҷии ин мусобиқоти сатҳи баланди байналмилалиро ворид созанд.

Соҳаи тарбияи ҷисмонӣ ва варзиш яке аз рукнҳои арзишмантарин ва муҳимтарини ҷомеа барои тарбияи насли наврас ва инсоният ба ҳисоб меравад. Зеро мақсади асосии тарбияи ҷисмонӣ ва варзиш танҳо иборат аз таҳкими саломатии инсон нест, балки он бо тарбияи меҳнатӣ, ақлӣ, ахлоқӣ ва эстетикӣ низ пайванди ногусастанӣ дошта, муаррифгари давлату миллат дар арсаи байналмилалӣ мебошад.

Дар асл, баъди ба даст овардани Истиқлолияти давлатӣ дар кишвар, муносибат ба соҳаи тарбияи ҷисмонӣ ва варзиш ҳамчун омили тандурстиву танумандӣ ва воситаи муаррифии давлати соҳибистиқлол мазмуну моҳияти нав пайдо кард.
Боиси ифтихору шарафмандии мо масъулини соҳа ва варзишгарон аст, ки бо таваҷҷуҳи Ҳукумати Ҷумҳурии Тоҷикистон ва ғамхориҳои ҳамешагии варзишпарваронаи Асосгузори сулҳу Ваҳдати миллӣ – Пешвои миллат, Президенти Ҷумҳурии Тоҷикистон, Президенти Кумитаи миллии олимпии Тоҷикистон муҳтарам Эмомалӣ Раҳмон иншооту толорҳои барҳавову ба талаботи замони муосир ҷавобгӯй бундёду азнавсозӣ гардида, ба рушди соҳаи тарбияи ҷисмонӣ ва варзиш заминаи мусоидро фароҳам оварда истодааст.

Дар ин росто, аз ҷониби Ҳукумати мамлакат ҳоло дар ҷумҳурӣ 10 934 иншооти варзишӣ, аз ҷумла 126 варзишгоҳ, 7601 майдончаи варзишӣ, 2251 толорҳои варзишӣ, 97 ҳавзҳои шиноварӣ, 88 маҷмааҳою марказҳои солимгардонӣ ва 771 иншооти махсуси варзишӣ мавҷуд мебошанд, ки дар онҳо ҷавонону наврасон ва варзишгарону сокинони мамлакат аз рӯи намудҳои гуногуни варзиш ба машқу тамринҳои доимӣ фаро гирифта шудаанд.

Бояд иброз намуд, ки танҳо дар замони соҳибистиқлолӣ дар муқоиса ба 70 соли замони пеш беш аз 9 маротиба теъдоди иншоотҳои соҳаи варзиш дар кишвар афзоиш ёфтааст.
Танҳо давоми нимсолаи якуми соли 2024 дар шаҳру ноҳияҳои ҷумҳурӣ 49 иншооти варзишӣ, аз ҷумла 35 майдончаи варзишӣ, 12 толори варзишӣ, 1 ҳавзи шиноварӣ ва 1 маҷмааи варзишӣ ва солимгардонӣ бо харҷи 17 миллиону 450 ҳазор сомонӣ сохта ба истифода дода шудааст, ки аз ин 2 миллиону 310 ҳазор сомонӣ аз ҳисоби маблағҳои буҷетӣ ва 15 миллиону 140 ҳазор сомонӣ аз ҳисоби соҳибкорону сарпарастон мебошад.

Бо мақсади ҷалб намудани наврасону ҷавонон ба варзиш ва омода намудани варзишгарони касбӣ ҷиҳати иштирок дар мусобиқаҳои сатҳи байналмилалӣ дар Ҷумҳурии Тоҷикистон 132 муассисаҳои таълимии варзишӣ, мактабҳои маҳорати олӣ ва тайёрии варзишӣ, 48 федератсияҳои варзишии олимпӣ ва ғайриолимпӣ, 43 клубҳои варзишии футбол ва дигар намудҳои варзиш фаъолият менамоянд, ки дар он наврасону ҷавонон аз рӯи 45 намуди варзиш дар 4215 гуруҳҳо ба машқу тамринҳои доимӣ фаро гирифта шудаанд.
Дар даврони соҳибистиқлолии кишвар як қатор санадҳои меъёрӣ ҳуқуқӣ ва барномаҳои соҳавӣ давра ба давра таҳия ва мавриди амал қарор гирифтанд, ки ба рушди соҳаи варзиш заминаи мусоид гузошт.

Аз ҷумла, дар таҳрири нав қабул гардидани Қонуни Ҷумҳурии Тоҷикистон “Дар бораи тарбияи ҷисмонӣ ва варзиш” ва дар заминаи он “Барномаи маҷмӯии рушди тарбияи ҷисмонӣ ва варзиш дар Ҷумҳурии Тоҷикистон барои солҳои 2022-2026” ва “Барномаи рушди футбол дар Ҷумҳурии Тоҷикистон барои солҳои 2022-2026” таҳия ва мавриди амал қарор гирифтанд, ки аз ҷумлаи тадбирҳои андешидашудаи Ҳукумати кишвар маҳсуб меёбанд.

Бояд ёдовар шавем, ки бо Фармони Президенти Ҷумҳурии Тоҷикистон шуруъ аз соли 2015 Ҷоизаи Президенти Ҷумҳурии Тоҷикистон барои ғолибону ҷоизадорони мусобиқаҳои байналмилалии варзишӣ таъсис дода шуд.
Дар доираи санади қабулшуда то ин муддат ба 318 нафар ғолибону ҷоизадорони мусобиқаҳои сатҳи байналмилалӣ аз фонди захиравии Президенти Ҷумҳурии Тоҷикистон 6 миллиону 423 ҳазору 750 сомонӣ мукофотпулӣ ҷудо гардида, дар вазъияти тантанавӣ тақдим карда шудааст.

Бо дарназардошти омӯзиши таҷрибаи давлатҳои пешрафтаи дунё Ҳукумати мамлакат, хосса Пешвои муаззами миллат муҳтарам Эмомалӣ Раҳмон ба рушди намудҳои варзиши олимпӣ таваҷҷуҳи хосса зоҳир карда, давоми соли сипаришуда аз ҷониби Ҳукумати Ҷумҳурии Тоҷикистон санаде ба имзо расид, ки ғолибон ва ҷоизадорони бозиҳои олимпӣ, паралимпӣ ва сурдлимпӣ дар Ҷумҳурии Тоҷикистон минбаъд бо стипендияи моддии моҳонаи якумра ҳавасманд карда мешаванд.
Натиҷаи чунин ғамхориҳост, ки солҳои охир варзишгарони кишварамон дар мусобиқаҳои байналмилалӣ пайваста иштирок намуда, бо сазовор гардидан ба ҷойҳои ифтихорӣ нуфузу эътибори сарзамини соҳибистиқлоламонро баланд бардошта, Тоҷикистони азизро дар арсаи ҷаҳонӣ муаррифӣ менамоянд.

Маҳз ҳамин тадбирҳои андешидашудаи Ҳукумати мамлакат имкон фароҳам овард, ки дар даврони соҳибистиқлолӣ 7353 маротиба Парчами давлатии Ҷумҳурии Тоҷикистон дар мусобиқаҳои сатҳи байналмилалӣ бо шарофати дастоварди варзишгарони кишвар баланд бардошта шуда, зиёда аз 2500 маротиба суруди миллӣ ба хотири дастоварди онҳо дар мусобиқаҳои сатҳи байналмилалии дохиливу хориҷӣ садо додааст.

Бори дигар бо итминони комил изҳор медорам, ки шумо масъулини соҳаи варзиш ва варзишгарони кишвар дар заминаи ғамхориву таваҷҷуҳи сиёсати пешгирифтаи варзишпарваронаи Пешвои муаззами миллат муҳтарам Эмомалӣ Раҳмон ва шароиту имкониятҳои фароҳамовардаи давлату Ҳукумат барои муаррифӣ ва ҳифзи нангу номуси миллат дар арсаи ҷаҳонӣ ҳамеша ҷаҳду талош варзида, Тоҷикистони соҳибистиқлолро муаррифӣ менамоед.

Дар ин роҳи пуршараф ва анҷоми рисолати бардушдошта ба Шумо комгориву муваффақиятҳои беназир ва тандурустиву хонаободиро таманно дорам.

РӮЗИ ВАРЗИШГАРОНИ ТОҶИКИСТОН МУБОРАК БОШАД!