Зиндагӣ ба инсон ҳама имкониятҳоро фароҳам меорад. Танҳо аз худи шахс вобаста аст, ки ин имкониятҳоро ба таври шоиста истифода барад. Имрӯз дар ҷомеаи мо кам нестанд ҷавононе, ки бо касбу ҳунар, маҳорати баланди варзишӣ ва бо ҷасорату матонати ватандӯстона худро дар ҷомеа шинохта ва ному шарафи кишварро баланд мебардоранд.

Яке аз ин гуна нафарон Наҷибулло Ҳақназаров аст. Ӯ варзишгари хуби риштаи гӯштини миллӣ, самбо ва ҷудо, ғолиби мусобиқаҳои сатҳи ҷумҳуриявӣ, ҳамзамон дорои истеъдоди санъати актёрӣ ва сарбози содиқи ватан мебошад.

Наҷибулло 23 сол дошта, зодаи шаҳри Кӯлоб аст. Муҳити варзишии оилавӣ сабаб гашт, то ӯ рӯ ба варзиш орад.
- Ман дар оилаи варзишгар ба дунё омадаам, ҳамаи хешовандони мо ба риштаҳои гуногуни варзиш машғуланд. Падарам, ки гӯштингир буд, мо бародарон ба роҳи ӯ рафтем. Ҳамин буд, ки оилаи моро дар Кӯлоб оилаи варзишгарон ё гӯштингирон ном мебурданд,- мегӯяд ӯ.

Наҷибулло сараввал дар назди падар ва амаки худ усулҳои гӯштини миллӣ ва ҷудоро меомӯзад. Пас аз он то 12 - солагӣ дар мактаби варзишии кӯдаконаи ноҳияи Кушониён машқу тамрини худро идома дода, аз синни 13 то 18-солагиаш дар Литсейи №1-и шаҳри Бохтар зери роҳбарии устоди варзиш Мирзоев Раҳим маҳорати варзишии худро сайқал медиҳад.

Наҷибулло Ҳақназаров аз зумраи он ҷавонони ватандӯсте ба ҳисоб меравад, ки дар баробари таҳсил ва варзиш бо сари баланд мардонавор хизмати Модар - Ватанро дар қисми ҳарбии 07017-и шаҳри Бохтар адо намуда истодааст.

Ӯ дар тӯли фаъолияти варзишиаш аз худ маҳорати баланд нишон дода, чандин бор ғолиби мусобиқаҳои сатҳи ҷумҳуриявӣ аз рӯи риштаи гӯштини миллӣ, ҷудо ва самбо гардидааст.

- Соли 2013 аввалин маротиба дар мусобиқаи сатҳи вилоятӣ аз намуди гӯштини самбо иштирок намуда, мақоми аввалро соҳиб гаштам ва пас аз он бароям роҳе боз шуд, баҳри иштирок дар дигар мусобиқаҳо, - мегӯяд қаҳрамони мо.

Ӯ афзуд, ки аз соли 2015 дар шаҳри Душанбе зери роҳбарии устоди варзиши Тоҷикистон Обидов Садриддин тамрини худро шурӯъ намуда, ду маротиба ғолиби мусобиқаи ҷумҳуриявӣ дар риштаи гӯштини миллӣ ва ҷудо (солҳои 2015-2016), як маротиба ғолиби мусобиқаи ҷумҳуриявӣ (соли 2017) ва ду маротиба ғолиби мусобиқаи шаҳрӣ (солҳои 2015-2017) аз намуди гӯштини самбо ва як маротиба ғолиби мусобиқоти вилоятӣ аз намуди гӯштини миллӣ (соли 2016) гардидааст.

“Вақте соли 2019 ба хизмати ҳарбӣ раҳсипор гаштам, дар давоми адои хизмат моҳи марти соли 2020 дар мусобиқаи хизматчиёни ҳарбӣ аз намуди гӯштини ҷудо иштирок намуда, бори аввал ҷоми вазири мудофиаи кишварро ба даст оварда, ба мусобиқоти байналмилалии ҷудо, ки дар Ҷумҳурии Қазоқистон баргузор мегардид, роҳхат гирифтам”, - нақл мекунад Наҷибулло.

Ҳамзамон ӯ рӯзҳои 16-17 марти соли равон дар мусобиқаи гӯштини миллӣ байни сарбозону афсарони кишвар, ки дар майдони варзишии клуби марказии варзишии артиши Вазорати мудофиа, воқеъ дар шаҳри Душанбе баргузор гардид, ширкат варзида, аз намуди гӯштини миллӣ дар вазни 75 кг ғолиб ва бори дуюм соҳиби ҷоми вазири мудофиа гардид. Пас аз ин ғолибият ӯ ба мусобиқаи байналмилалӣ миёни хизматчиёни ҳарбии Иттиҳоди Давлатҳои Мустақил, ки моҳи майи соли ҷорӣ баргузор мегардад, роҳхат гирифт.

Наҷибулло ғайр аз варзиш истеъдоди хуби актёрӣ низ дошта, муддате дар Донишкадаи давлатии фарҳанг ва санъати Тоҷикистон ба номи Мирзо Турсунзода аз рӯи ихтисоси санъати актёрӣ таҳсил намудааст. Ният дорад, пас аз хизмати ҳарбӣ дар Донишкадаи тарбияи ҷисмонӣ таҳсил намуда, дар мусобиқаҳои байналмилалӣ иштирок намояд.

- Мехоҳам сараввал дар мусобиқаи дар пешистода, ному шарафи кишварро баланд бардошта, пас аз адои хизмати ҳарбӣ машқу тамрини варзишии худро аз рӯи гӯштини миллӣ, самбо ва ҷудо идома диҳам ва дар мусобиқаҳои сатҳи байналмилалӣ иштирок намоям. Орзуи деринаам ин аст, ки гӯштини миллиамонро дар ҷаҳон муаррифӣ созам, - бо сарбаландӣ дар интиҳо гуфт, Наҷибулло.

Исфандиёр АМАКҶОНОВ, "ҶТ"