Кумитаи кор бо ҷавонон ва варзиш дар натиҷаи ҳамкориҳои мутақобилан судманд бо вазорату идораҳо, ташкилотҳои ҷамъиятӣ, ҷомеаи шаҳрвандӣ, бахши хусусию соҳибкорони ватанӣ ва ВАО дар самти сиёсати давлатии кор бо ҷавонон 12 236 чорабинӣ бо фарогирии 2 052 027 нафар наврасону ҷавонон ва дигар сокинони кишвар баргузор намудааст.

Аҳтам Абдуллозода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, ин нуктаро санаи 31 июл, зимни нашасти матбуотӣ ба рӯзноманигорон иброз намуд.

Ба таъкиди номбурда дар самти тарбияи ҷисмонӣ ва варзиш дар нимсолаи аввали соли 2018 4710 чорабинии варзишӣ бо фарогирии 1 101 610 нафар шаҳрвандон, аз ҷумла 241 002 нафар бонувон амалӣ карда шуд. Дар маҷмуъ дар ин нимсола дар саросари кишвар дар соҳаи кор бо ҷавонон ва варзиш 16 946 чорабинӣ бо фарогирии 3 153 682 нафар наврасону ҷавонон ва сокинони ҷумҳурӣ доир гардидааст.

Ҷиҳати бо шуғл фаро гирифтани ҷавонони бе ҷои кор гуфта шуд, ки Кумитаи кор бо ҷавонон ва варзиш ва сохторҳои он дар маҳалҳо дар натиҷаи ҳамкориҳои судманд бо Вазорати меҳнат, муҳоҷират ва шуғли аҳолии ҷумҳурӣ барои дарёфти ҷойи кори муносиб ва касбомӯзии ҷавонон 381 маротиба ярмаркаҳои ҷойҳои кории холӣ баргузор карда шуда, дар онҳо 41 651 ҷойи корӣ пешниҳод гардида, 112 693 нафар шаҳрвандон барои дарёфти ҷойи корӣ муроҷиат намуданд. Аз шумораи умумии муроҷиаткунандагон 8057 нафар ба ҷойи кори доимӣ ва мавсимӣ таъмин гардида, 6585 нафар ба курсҳои бозомӯзӣ фаро гирифта шуданд.

Ҳамчунин Аҳтам Абдуллозода, раиси Кумитаи кор бо ҷавонон ва варзиш, аз дастовардҳои варзишгарони кишвар дар нимсолаи аввали соли 2018 ёдовар шуда, иброз дошт, ки бо мақсади муаррифии кишвари азизамон дар мусобиқаҳои байналмилалӣ 216 нафар варзишгарони дастаи мунтахаб, аз ҷумла 18 нафар бонувон бо харҷи 863 675 сомонӣ сафарбар шуда, инчунин танҳо аз ҷониби Кумита дар нимсолаи якуми соли 2018 ба 15 чорабинии сатҳи байналмилалӣ 35 варзишгар, аз ҷумла 6 нафар бонувон бо харҷи 238 280 сомонӣ сафарбар гардидаанд. Варзишгарон дар натиҷа ба хазинаи варзишии ҷумҳурӣ 105 медал, аз ҷумла 36 тилло, 21 нуқра ва 48 биринҷӣ ворид намуданд, ки боиси ифтихори мо мебошад.

Гуфта шуд, ки айни ҳол дар кишвар 122 варзишгоҳ, 6619 майдончаи варзишӣ, 1702 толори варзишӣ, 88 ҳавзи шиноварӣ ва 788 маҷмааҳои варзишӣ, новобаста аз шакли моликияташон, дар ҷумҳурӣ ба қайд гирифта шуда, дар мактабҳои варзишӣ 4130 гурӯҳҳо бо фарогирии 47654 машқварзони наврасу ҷавон фаро гирифта шудааст.

Беҳрӯз ХОЛМУРОДОВ,
Фирӯз АБДУРАҲМОНОВ, “ҶТ”