Аз 23 то 27 августи соли ҷорӣ дар шаҳри Душанбе X-умин мусобиқаи байналмилалӣ оид ба теннис миёни наврасони то 17 - сола барои дарёфти “Ҷоми Президенти Ҷумҳурии Тоҷикистон” баргузор мегардад.

Дар мусобиқа варзишгарон аз ҷумҳуриҳои исломии Афғонистон, Белорус, Канада, Қирғизистон, Покистон, Туркманистон, Тоҷикистон, Ӯзбекистон, Федератсияи Россия ва ИМА иштирок менамоянд.

Ҷумҳурии моро 35 нафар варзишгар дар ин мусобиқа намояндагӣ менамоянд. Қувваозмоиҳо миёни варзишгарон дар корти тенниси “Роҳи оҳан” – и шаҳри Душанбе доир мегарданд.

Мусобиқаи байналмилалӣ оид ба теннис миёни наврасон барои дарёфти “Ҷоми Президенти Ҷумҳурии Тоҷикистон” cоли даҳум аст, ки бо иштироки беҳтарин теннисбозони наврасу ҷавони қитъаҳои гуногуни олам доир мешавад.

Мусобиқа 4 рӯз дар ҳайати инфиродӣ ва даставӣ миёни писарону духтарон идома ёфта, дар ҷамъбаст ба ғолиби ҷойи аввал 1000 доллари ШМА, ҷои дуюм 800 доллар ва ҷои сеюм 500 доллари ШМА ҷоизапулӣ тақдим мегардад.

Имрӯз соати 16:00  маросими кушодашавии мусобиқаи байналмилалӣ оид ба теннис барои дарёфти “Ҷоми Президенти Ҷумҳурии Тоҷикистон” дар корти тенниси “Роҳи оҳан” – и шаҳри Душанбе доир мегардад.