Субҳи имрӯз, 5 май дар сартосари ҷумҳурӣ ҳамоиши ҷумҳуриявии «Як рӯзи велосипедронӣ» доир шуд.

Чорабинии мазкур бо ташаббуси Кумитаи кор бо ҷавонон ва варзиши назди ҳукумати Ҷумҳурии Тоҷикистон роҳандозӣ шуда, варзишгарону ҷавонон ва сокинони зиёди пойтахт баҳри иштирок дар ҳамоиш назди Боғи «Ҷавонон» ҷамъ омаданд.

Дар оғози ҳамоиши мазкур муовини аввали Раиси Кумитаи кор бо ҷавонон ва варзиши назди Ҳукумати ҷумҳурӣ Ризо Назарзода суханронӣ намуда, иброз дошт, ки дар заминаи сиёсати варзишпарваронаи Пешвои миллат муҳтарам Эмомалӣ Раҳмон ва дастгирии ҳамешагии Раиси шаҳри Душанбе Рустами Эмомалӣ бори нахуст дар Тоҷикистон ҳамоиши ҷумҳуриявии «Як рӯзи велосипедронӣ» баргузор мегардад. Ин иқдом имкон медиҳад, ки мардум бештар ба варзиш, солимгардонӣ ва таҳкими тарзи ҳаёти солим рӯ оранд.

«Имрӯз роҳбарону кормандони ҳар як сохтор бо велосипед ба кор мераванду давоми рӯз аз он истифода мекунанд, ки ин ба саломатӣ, хароҷоти молиявӣ ва ба фазои экологии ҷумҳурӣ фоидаи калон мерасонад. Бо боварӣ метавон гуфт, ки ин иқдом минбаъд низ дар ҳаёти ҳаррӯзаи шаҳрвандону ҷавонон анъана мегардад ва онҳо дар кори ҳамарӯзаи худ аз велосипед истифода мекунанд», — афзуд Р. Назарзода.

Кумитаи кор бо ҷавонон ва варзиши назди Ҳукумати Ҷумҳурии Тоҷикистон тасмим гирифтааст, ки шуруъ аз ҳамин рӯҳз ҳамасола 5 май дар Тоҷикистон ҳамоиши ҷумҳуриявии «Як рӯзи велосипедронӣ» баргузор карда мешавад.

Ҳамоиш аз пойтахти кишварамон - шаҳри Душанбе оғоз гардида, давоми рӯз дар боғҳои фарҳангӣ — фароғатӣ ва гулгаштҳои ҳудуди ҷумҳурӣ сокинон ба таври васеъ ба ин намуди варзиш ҷалб карда мешаванд.