Юсуф Абдусаломов, ҷаҳонпаҳлавони тоҷик, барандаи нишони нуқраи Бозиҳои олимпии соли 2008, сармураббии мунтахаби Тоҷикистон оид ба гӯштини тарзи озод таъин шуд.

Дар ин бора varzishtv.tj хабар додааст.

Бино ба иттилоъ дирӯз бо баргузории як нишаст дар қароргоҳи Федератсияи гӯштини Тоҷикистон, ки бо иштироки роҳбарияти федератсия ва маъулини Кумитаи миллии олимпӣ доир гардид, Юсуф Абдусаломов дар ҳайати тими миллии Тоҷикистон ошно гардонида шуд. Дар нишасти мазкур варзишгарон ва мураббиёни Федератсияи гӯштини тарзи озод ва юнону румӣ низ ҳузур доштанд.

Пас аз шиносоӣ Юсуф Абдусаломов ҳамроҳи мураббиён ва варзишгарон суҳбат намуда, зимни он аз мусобиқаи баргузоргардидаи чемпионати Тоҷикистон оид ба гӯштини тарзи озод ва юнону румӣ низ андешаронӣ кард.

Бо мақсади омодагии варзишгарони тоҷик ба мусобиқаҳои сатҳи баланд имрӯз дар Кумитаи миллии олимпӣ чорабини доир шуда, зимни он дар мувофиқа бо Кумитаи миллии олимпӣ ва Федератсияи гӯштини Тоҷикистон Юсуф Абдусаломов сармураббии дастаи мунтахаби кишвар оид ба гӯштини тарзи озод таъин гардид.
Дар асоси қарордоди мазкур Юсуф Абдусаломов то моҳи сентябри соли 2024 тими миллии гӯштини тарзи озоди Тоҷикистонро ба Бозиҳои олимпии тобистона омода менамояд.