Шуруъ аз имрӯз - 23-юми апрели соли равон Маҷмааи фарҳангиву таърихии “Қалъаи Хуҷанд” расман дари худро барои сокинону сайёҳон боз намуд.

Дар ин бора аз хадамоти матуботи раиси вилояти Суғд хабар доданд.

Ба иттилои манбаъ, шаҳрвандон метавонанд шуруъ аз имрӯз аз “Қалъаи Хуҷанд” тариқи пулакӣ боздид ва ҳам истироҳат намоянд. Хизматрасонӣ дар Маҷмааи фарҳангиву таърихии “Қалъаи Хуҷанд” ба тариқи зайл муайян шудааст:

- барои шаҳрвандони хориҷӣ 100 сомонӣ;

- барои шаҳрвандони аз 16 сола боло 30 сомонӣ (сӣ сомонӣ);

- барои то 16 солаҳо 10 сомонӣ (даҳ сомонӣ) ва барои кӯдакони томактабӣ ройгон.

Ҳамчунин тибқи талаботи қонунгузорӣ барои ашхоси имтиёздор низ хизматрасонӣ ройгон ба роҳ монда шудааст.

Ёдовар мешавем, ки Маҷмааи фарҳангиву таърихии “Қалъаи Хуҷанд” 11 апрел бо иштироки Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ифтитоҳ гардида буд.

Қалъаи Хуҷанд ба ҳайси истеҳкоми боэътимод, ки таърихи сеҳазорсола дорад, бо маблағгузории Мақомоти иҷроияи ҳокимияти давлатии вилояти Суғд эҳё ва барқарор карда шуд.