Калонтарин ва дурдастрин ноҳияи ВМКБ Мурғоб мебошад, ки дар баландии 3 ҳазору 576 метр аз сатҳи баҳр қарор гирифтааст. Аз давраҳои пеш ин мавзеъ нафақат бо боигариҳои табиву конҳои маъданӣ дар ҷаҳон шӯҳрат пайдо кард, балки бо ҳайвоноти нодир аз қабили архари кӯҳии Марко Поло, нахчири муқимии Киик, паланги барфӣ ё худ Ирбис, суғури сурх, хирси ҷойдорӣ ва ғайра таваҷҷӯҳи оламиёнро ҷалб намудаст.

Дар ноҳия се ширкати туристии «Гиды Памира», « Сайёҳат » ва «Помир – маркази Осиё» фаъолият доранд, ки солҳои охир дар рушди соҳаи сайёҳӣ саҳми муносиб доранд.

Имсол чашмаҳои шифобахши ноҳияи мазкур ба монанди Қизилработ, ки дар ҷамоати Тохтамиш ҷойгир мебошад, дар маркази диққати сайёҳон қарор гирифтааст. Бар зами ин ҳамарӯза сайёҳони зиёд аз обҳои дармонбахши Модиён, Шаймоқ ва Исихбулоқи Мурғоб табобат мегиранд.



Мувофиқи маълумоти расмии Шуъбаи Вазорати Корҳои Дохилии ноҳияи мазкур дар шаш моҳи соли ҷорӣ ба ноҳияи Мурғоб беш аз 107 нафар сайёҳони хориҷӣ аз кишварҳои Русия, Австралия, Белгия, Канада, Олмон, Украина, Амрико, Англия, Шветсия, Норвегия, Лаҳистон ва Ҷопон ташриф оварданд.

Маврид ба зикр аст, ки мавсими сайёҳӣ дар ин ноҳияи баландкӯҳ асосан охирҳои моҳи июл ва аввали моҳи август оғоз мегардад. Чунки иқлими ноҳия маҳз дар ҳамин вақтҳо барои сайёҳат мувофиқ аст.

Дар назар аст, ки рӯзҳои охир воридшавии сайёҳон ба ноҳия дучанд афзояд.

Мувофиқи тавзеҳоти Ҳайдарбек Каримов, сармутахасиси бахши ҷавонон варзиш ва сайёҳии ноҳияи Мурғоб, имсол воридшавии сайёҳон нисбати солҳои қаблӣ зиёдтар ба назар мерасад.



Аксари онҳо моҳи август ба ноҳия расида, чун ҳарвақта аз моҳи сентябр дар Қарақӯли ноҳияи Мурғоб мавсими мусобиқаи қаиқронӣ ё худ рафтинг оғоз мегардад.

Қисми зиёди сайёҳони хориҷӣ ба хотири тамошои бозиҳои рафтингӣ ба ноҳия ташриф меоранд.

Агарчи соли гузашта дар мусобиқаи қаиқронӣ 20 нафар вазишгари касбӣ аз ҳисоби хориҷиён баромад намуданд, имсол, дар мусобиқаи мазкур , ки то 10 сентябр баргузор мегардад, теъдоди бештари рафтингчиёнро қатори варзишгарони ватанӣ хориҷиён ташкил медиҳанд.

Ба гуфти Ҳайдарбек Каримов вақтҳои охир хизматрасонии сайёҳӣ дар ноҳия Мурғоб нисбатан хуб ба роҳ монда шуда, феълан дар баъзе мавзеҳои ноҳия якчанд меҳмонхонаҳои наву замонавӣ бо шароитҳои муосир кушода шуданд. Ҳолати санитариву гигиенӣ низ дар ин меҳмонхонаҳо хуб ба роҳ монда шудааст.

Ҳамзамон дар меҳмонхонаҳои амсоли Homestay, ки дар хонаҳои муқаррарии сокинони таҳҷоӣ ба шакли юртаҳо фаъолият доранд, аз ҷониби сайёҳон хуш пазируфта мешаванд.