Имрӯз дар ноҳияи Муъминободи вилояти Хатлон Форум ва Намоишгоҳи байналмилалии сайёҳӣ таҳти унвони “Хатлон- сарзамини тамаддунҳо ва саёҳат” оғоз гардид.

Ин чорабинӣ рӯзҳои 4-5 июн баргузор шуда, даҳҳо ширкаткунандагон аз дохил ва хориҷи кишварро гирди ҳам меорад.
Бино ба иттилои масъулин, чорабинии мазкур дар мавзеи сайёҳии “Чилдухтарон” доир шуда, дар он намояндагони беш аз 20 кишвари ҷаҳон аз ҷумла, намояндагони давлатҳои гуногуни ҷаҳон, ширкатҳои сайёҳӣ, сармоягузорон, созмонҳои байналмилалӣ ва коршиносони соҳа ҳудудан 350-400 нафар ширкат хоҳанд кард.

Ба зикри ташкилкунандагон, чорабинии мазкур бо мақсади муаррифии имкониятҳои сайёҳии вилояти Хатлон ва ҷалби сармоя ба рушди инфрасохтори соҳа роҳандозӣ шуда, ҳамзамон барои ҷалби сайёҳони хориҷӣ, таблиғи захираҳои таърихию фарҳангӣ, табобатию экологӣ, кӯҳнавардӣ ва дигар намудҳои сайёҳӣ равона гардидааст.

Ҳамзамон, гуфта мешавад, ки дар доираи форум намоишгоҳи имкониятҳои сайёҳӣ ва армуғонҳои вилояти Хатлон баргузор гардида, ба иштирокчиён шароити мусоидбарои муаррифӣ ва фурӯши маҳсулоти сайёҳӣ, инчунин шиносоӣ бо таомҳои миллӣ фароҳам оварда мешавад.

Фарзонаи УМАРАЛӢ, “ҶТ”