1 май мавсими туристӣ дар соли 2016 оғоз мегардад. Ба ин муносибат ва ба хотири рушди туризми дохилӣ як гурӯҳи ҷавонон фардо - 30 апрел ба тамошои дараи Ромити шаҳри Ваҳдат ва Боғи Ғалабаи пойтахт мераванд.

Тавре аз Кумитаи ҷавонон, варзиш ва сайёҳӣ иттилоъ доданд, мақсад аз баргузор кардани саёҳат тақвияти ҳисси ватандӯстиву худшиносии миллӣ, бедор намудани ифтихори ватандорӣ дар ниҳоди ҷавонон, рушди туризми дохилӣ тавассути эҳё намудани саёҳатҳои шаҳрӣ (сити турҳо), боздид аз ҷойҳои таърихию фарҳангӣ ва шиносоӣ бо захираҳои туристии кишвар мебошад.

- Аз ин ба баъд шаҳрвандони ҷумҳурӣ махсусан, хонандагон, донишҷӯён ва кормандони идораву муассисаҳо низ метавонанд барои дидани мавзеъҳои ҷолиби кишвар тавассути ширкатҳои туристӣ ба Кумитаи ҷавонон, варзиш ва сайёҳӣ муроҷиат намоянд.