Ризо Назрзода, муовини раиси Кумитаи ҷавонон, варзиш ва сайёҳӣ бо сафири Ҷумҳурии Тоҷикистон дар Ҷумҳурии Корея Юсуф Шарифзода ва роҳбари ширкати сайёҳии «AMEKS TRAVEL» Аҳн Байнг Чул мулоқот кард.

Ҷонибҳо доир ба ҳамкории кишварҳо дар соҳаи сайёҳӣ табодули афкор намуда, масъалаҳои марбут ба ин соҳаро мавриди баррасӣ қарор доданд.

Ризо Назарзода вобаста ба имкониятҳои соҳаи сайёҳӣ дар кишвар андешаронӣ карда, изҳор намуд, ки “барои рушди туризм нақша дорем соли 2017-ро «Соли рушди туризми устувор» эълон кунем”.

Дар мулоқот, ҳамчунин оид ба масъалаҳои имкониятҳои сармоягузорӣ дар соҳаи туризм, баланд бардоштани малакаи кории мутахассисони соҳа, ҷалби туристон ба кишвар ва дигар масоили мавриди назар баррасӣ шуд.

Лозим ба ёдоварист, ки соли 2015 776 нафар ва дар шаш моҳи аввали соли 2016 306 нафар сайёҳ аз Корея ба Тоҷикистон ташриф оварда, Ҷумҳурии Корея дар бистгонаи ташрифоти шаҳрвандони хориҷӣ ба Тоҷикистон ворид гардидааст.