Бо ташаббуси Кумитаи ҷавонон, варзиш ва сайёҳӣ ва дастгирии раиси вилояти Суғд Абдураҳмон Қодирӣ соли дуюм аст, ки ҷавонони кишвар ба лагери эко-туристии “Артуч” ҷалб мешаванд.

Ин навбат 65 нафар ҷавон аз ҳамаи минтақаҳои кишвар номнавис шуда, 50 нафари онҳо тариқи озмун ба лагер даъват шуданд.

- Мақсад аз баргузор намудани лагер рушди туризми дохилӣ, омода намудани роҳбаладҳо барои қабули туристон, намоиши мавзеъҳои туристӣ ва тарғиби он байни сайёҳон ва аҳолӣ аст, - гуфт Зариф Мирдадо, сардори Раёсати ҷавонон, варзиш ва сайёҳии вилояти Суғд.

Иштирокчиён аз семинарҳои туристӣ бархӯрдор гардида, аз қаторкӯҳҳои Фон ва кулҳои он дидан намуданд. Лагери эко-туристии “Артуч”, ки 25 июл оғоз гардида буд, то 30 июл идома меёбад.