Имрӯз дар маҷлисгоҳи Вазорати молияи Ҷумҳурии Тоҷикистон ба ифтихори таҷлили сазовори Ҷашни 30-солагии Истиқлоляти давлатии Ҷумҳурии Тоҷикистон ҳамоиши ҷавонони соҳаи молияи кишвар зери унвони “Нақши ҷавонон дар 30 соли соҳибистиқлолӣ” доир гардид.


Дар ҳамоиши мазкур Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Рукмина Сафарзода муовини вазири молия, Ризо Назарзода, муовини аввали КҶВ, кормандони соҳаи молия, инчунин устодон ва донишҷӯёни Донишгоҳи давлатии молия ва иқтисоди Тоҷикистон иштирок намуданд.

Рукмина Сафарзода ҳамоишро оғоз намуда, қайд кард, ки дастовард ва дурнамои ҷавонон дар замони соҳибистиқлолӣ зиёд ба назар мерасад. Ҷавонони мо дастуру ҳидоятҳои сарвари давлатро сармашқи кори худ қарор дода, баҳри ободии диёри азизамон саҳми босазои худро гузошта истодаанд. Ҳамин аст, имрӯз дар Вазорати молия шумораи зиёди кормандону аъзоёнро ҷавонон ташкил медиҳанд.   

Баъдан Абдулло Раҳмонзода, раиси КҶВ суханронӣ карда, аз саҳми ҷавонон дар рушду пешрафти мамлакат изҳори қаноатмандӣ намуданд. Эшон аз ҷавонон даъват ба амал оварданд, ки дар ин авзои ҷомеа пайи ҳимояи марзу буми кишвар ва ҷангҳои иттилотӣ бетараф набуда, барои манфиати халқу миллат талош варзанд.

Дар идомаи ҳамоиш аз ҷониби кормандони вазорати молия маърӯзаҳо дар мавзӯъҳои “Рушди низоми молияи давлатӣ ва нақши ҷавонон дар 30 соли солҳои соҳибистиқлолӣ”, “Ҷанбаҳои асосии Паёми Пешвои миллат нисбат ба ҷавонон ва бархе аз дастовардҳои мақомоти молия дар соҳаи соҳибистиқлолӣ”, “Рушди муносибатҳои дуҷонибаи Ҷумҳурии Тоҷикистон бо ташкилотҳои байналмилалии молиявӣ дар замони истиқлолияти давлатӣ” ва “Нақши Пешвои миллат дар баланд бардоштани савияи донишҷӯён” хонда шуд.

Дар охири ҳамоиш бошад, Муроҷиатномаи ҷавонони Вазорати молияи Ҷумҳурии Тоҷикистон ироа гардид.

Исфандиёр АМАКҶОНОВ “ҶТ”