Фардо, 24 сентябр, дар арафаи Рӯзи ҷаҳонии туризм, ки ҳар сол 27 сентябр таҷлил мешавад, дар меҳмонхонаи “Лотус”-и шаҳри Душанбе семинари ҷумҳуриявӣ дар мавзӯи «Такмили қонунгузорӣ омили рушди сайёҳӣ» баргузор мегардад.

Дар семинар, ки бо ташаббуси Кумитаи ҷавонон, варзиш ва сайёҳӣ бо мақсади татбиқи босамари Барномаи рушди туризм дар Ҷумҳурии Тоҷикистон дар давраи солҳои 2015-2017 доир мешавад, масъулини соҳа масъалаҳои такмили қонунгузории соҳаи сайёҳии кишварро мавриди баррасӣ қарор медиҳанд.

Бояд қайд намуд, ки такмили қонунгузории соҳаи сайёҳӣ барои беҳдошти фаъолият дар ин самт нақши асосӣ дошта, номукаммал будани заминаи меъёрию ҳуқуқӣ барои рушди минбаъдаи он монеаи ҷиддӣ мегардад.

Ҳамзамон, дар кори семинар Қонуни Ҷумҳурии Тоҷикистон «Дар бораи рушди туризми дохилӣ» аз ҷониби вакили Маҷлиси намояндагони Маҷлиси Олии Ҷумҳурии Тоҷикистон муаррифӣ шуда, мавриди баррасӣ қарор мегирад.

Масъулин ҳамкорӣ ва саъю кӯшиши якҷояи сохторҳои давлатию хусусиро барои рушди соҳаи туризм дар асоси қонунгузории дурусти соҳавӣ, сабаби эҳёи босуръати ин соҳа номида, изҳор медоранд, ки ин метавонад барои сарчашмаҳои нави даромади буҷет ва даромадҳои шахсӣ, таъмини шаҳрвандон бо ҷойҳои нави кор ва паст гардидани сатҳи камбизоатӣ мусоидат менамояд.