Кумитаи рушди сайёҳии назди Ҳукумати Ҷумҳурии Тоҷикистон дар якҷоягӣ бо Созмони ҷаҳонии сайёҳӣ (UNWTO) тасмим гирифтааст, ки моҳи сентябри соли ҷорӣ Форуми ҷаҳонии сармоягузории сайёҳиро дар мавзӯи "Тағйир додани иқтисод тавассути сармоягузориҳои стратегӣ дар соҳаи сайёҳӣ" дар шаҳри Душанбе баргузор намояд.

Дар ин бора 1 август зимни нишасти матбуотии ниҳоди мазкур хабар дода шуд.

Тавре муовини аввали раиси Кумита Рустам Холматиён иброз дошт, дар форум намояндагони соҳаи сайёҳии кишварҳои узви UNWTO, инчунин сармоягузорон, коршиносон ва намояндагони бахшҳои давлатӣ ва хусусӣ гирди ҳам хоҳанд омад.

Таъкид гардид, ки Кумитаи рушди сайёҳӣ бо мақсади таъмини рушди устувори соҳаи сайёҳӣ, таблиғу муаррифии имконоти сайёҳии кишвар, ҷалби сармоя, рушди сайёҳии дохилию байналмилалӣ зиёда аз 17 чорабинӣ дар дохили кишвар баргузор намуда, дар 9 намоишгоҳи сайёҳии сатҳи байналмилалӣ зарфиятҳои сайёҳии мамлакатро ба таври васеъ муаррифӣ намуд.

Ш. ЭШОНОВА, “ҶТ”