Имрӯз, 17 июн, раиси Кумитаи ҷавонон, варзиш ва сайёҳӣ Аҳтам Абдуллозода бо сафири Штатҳои Муттаҳидаи Амрико дар Тоҷикистон Элизабет Миллард мулоқот кард.

Дар мулоқот ҳамкориҳои дуҷониба дар риштаҳои гуногун мавриди таҳлилу баррасӣ қарор гирифт.

Аҳтам Абдуллозода иброз дошт, ки имрӯз соҳаи туризм яке аз соҳаҳои ҷавон дар кишвари мо ба ҳисоб рафта, ҳамкориҳои мутақобилан судманди тамоми мақомоту идораҳо ба татбиқи босамар ва босифати сиёсати давлатӣ дар туризм ва беҳтар сохтани фазои фаъолият дар ин самти муҳим ба иқтисодиёти миллӣ заминагузор хоҳад шуд.

Элизабет Миллард гуфт, аз вақти омаданаш ба Тоҷикистон зебоиҳои ин сарзамин ӯро ба ҳайрат овардааст. Қайд намуд, ки дар пайи сафарҳо аз чандин минтақаҳои сайёҳии Тоҷикистон дидан намуда, ният доранд, то як мутахассисеро даъват намоянд, то ин ҳама рангорангиро мавриди омӯзиши амиқ қарор диҳад.

Номбурда, инчунин вобаста ба рушди ҳамкориҳои дуҷониба андешаронӣ намуда, зикр сохт, ки баҳри рушди соҳаи сайёҳӣ ва дигар соҳаҳо ҳамеша барои  ҳамкорӣ омодаанд.  

Қайд гардид, ки шумораи сайёҳон аз ШМА дар семоҳаи якуми соли 2016 ба 382 нафар мерасад. Дар соли 2015 бошад 3592 нафар сайёҳ аз ин кишвар ба Тоҷикистон ташриф овардаанд, ки нисбат ба соли 2014 1993 нафар зиёд мебошад.

Изҳори бовар карда шуд, ки барои боз ҳам пурзӯр кардани ҳамкориҳои мутақобилан судманд дар самти туризм ҷалби коршиносони байналмилалии соҳаи туризми Амрико ба Ҷумҳурии Тоҷикистон манфиат хоҳад овард.