Бо ибтикори Кумитаи ҷавонон, варзиш ва сайёҳӣ дар меҳмонхонаи “Истиқлол”-и пойтахт курси омӯзишӣ барои кормандони субъектҳои хоҷагидорӣ, меҳмонхонаҳо, ошхонаҳо, осоишгоҳҳо ва дигар иншооти хизматрасонӣ дар соҳаи туризм оғоз гардид.

Аҳтам Абдуллозода, раиси Кумитаи ҷавонон, варзиш ва сайёҳии назди Ҳукумати ҷумҳурӣ чорабиниро оғоз бахшида, иброз дошт, ки баргузории курси мазкур эҳтиёҷоти бисёр шадиди бозори сайёҳии Тоҷикистон ба хизматрасонии сатҳи баланд мебошад.

- Раванди босуръати рушди муносибатҳои иқтисодӣ, махсусан дар бозори сайёҳӣ моро водор менамояд, ки ба хотири таъмини рақобатпазирӣ байни ширкатҳои сайёҳӣ ба хотири беҳтар сохтани кор ва ҳамзамон аз нигоҳи касбӣ ва мутобиқ ба талаботи замони муосир муаррифӣ кардани низоми кори сайёҳӣ дар кишварамон сатҳ ва сифати хизматрасониро баланд бардорем. Проблемаҳое, ки имрӯз фарогири кори мо аст, пеш аз ҳама набудани хизматрасонии муносиб ба шарикони ҳамкор ва махсусан ба сайёҳоне, ки ба кишвари мо ворид мегарданд, мебошад. Сайёҳ вақте вориди Тоҷикистон мешавад, бояд унсурҳои шаҳрвандии хизматрасонӣ, шуруъ аз хизматрасонии мусофиркашӣ, қабули меҳмон дар даҳлези меҳмонхона, пешниҳоди маълумоти муфассал доир ба намудҳои хизматрасонӣ дар дохили меҳмонхона то пешниҳоди хизматрасонӣ дар рӯзи холигии сайёҳ дар сатҳи баланд бошанд. Ҳамаи ин ҳолатҳое ҳастанд, ки мо бояд чораандешӣ кунем. Аз хизматрасонии хубу босифат оянда инкишоф ёфтани соҳаи сайёҳӣ ва батадриҷ зиёд шудани шумораи сайёҳон вобастагии калон дорад, - гуфт А. Абдуллозода.

Гуфта шуд, ки дар замони имрӯза хизматрасонӣ ва маркетинг ҳамрадиф шудаанд. Бо истифода аз элементҳои муосири маркетингӣ мо метавонем намудҳои хизматрасониамонро якчанд моҳ пеш аз шуруъ шудани мавсим ба фурӯш барорем.

- Мо бояд зинаҳои оддитарини пешниҳоди хизматрасониро ба шахсоне, ки дар иншооти хизматрасонӣ кору фаъолият мекунанд, омӯзонем. Роҳбарони иншооти хизматрасонӣ ҳеҷ набошад дар як моҳ ду маротиба курсҳои омӯзиширо барои кормандон, мутахассисони ширкаташон гузаронанд. Ҳар қадаре, ки мо сатҳ ва сифати хизматрасониро баланд кунем, обрӯву эътибори соҳаи сайёҳӣ дар кишварамон баланд мегардад. Эҳтимолияти аз нав ва ба тариқи такрорӣ боздиди сайёҳон ба Тоҷикистон зиёд мегардад ва аз ҳама муҳим эътимоди шарикони мо дар хориҷа баланд мегардад, - афзуд А. Абдуллозода.

Сипас, Назарзода Ризо, муовини раиси Кумитаи ҷавонон, варзиш ва сайёҳӣ, Туйғун Каримов, роҳбари Маркази инкишоф ва дастгирии омӯзиши касбии “Мактаби миллии меҳмондорӣ”, Ситора Набиева, роҳбари ширкати сайёҳии “Тоҷикистон тревел”, Сулҳия Ҳайдарова, менеҷери меҳмонхонаи “Серена Душанбе” дар мавзӯъҳои “Имкониятҳо ва заминаҳои нави ҳамкорӣ дар рушди туризми Тоҷикистон”, “Тайёрии кадрҳои касбӣ дар соҳаи туризм ва меҳмондорӣ”, “Роҳбалади касбӣ ва нақши ӯ дар муаррифии кишвар” ва “Тарзи дурусти ба роҳ мондани хизматрасонӣ ба меҳмонон ҳангоми қабул ва гусел” баромад карданд.

Дар фарҷоми рӯзи аввали омӯзиш оид ба мавзӯъҳои матраҳшуда байни иштирокдорон муҳокимарониҳо сурат гирифт.

Курси омӯзишӣ то 3 октябр идома меёбад.