Дар Осиёи Ҷанубӣ Шоҳигарии Бутан ҷойгир шудааст. То соли 1974 одами оддӣ наметавонист ба ин кишвар сафар намояд. Танҳо бо даъвати махсуси шоҳигарӣ сафар ба ин кишар имконпазир буд. Имрӯз низ на ҳар сайёҳ имконияти сафар ба ин кишварро дорад. Зеро барои ҳар як рӯзи дар Бутан истодан бояд маблағи муайянеро ба хазинаи ин кишвар пардохт намуд. Ҳукумати ин кишвар бо ҳамин роҳ мехоҳад, ёдгориҳои фарҳангӣ ва анъанаҳои миллии худро ҳифз намояд. Танҳо шаҳрвандони кишварҳои ҳамсоя - Ҳиндустон, Малдив ва Бангладеш ҳуқуқи мустақилона дар Бутан сайёҳат карданро доранд. Шаҳрвандони дигар кишварҳо бояд аз ширкатҳои сайёҳии иҷозатномадошта роҳхати сафарро дарёфт намоянд. Ба маблағи он роҳхат меҳмонхона, ғизо ва ҳамроҳии мунтазами роҳбалад дохил мешавад. Аз роҳбалад даст кашидан имкон надорад. Як саёҳати 15-рӯза дар ин кишвар хеле гарон аст. Аз ин хотир туризм аз даромадноктарин соҳаҳои ин кишвар буда, дар иқтисодиёт ҷои 3-юмро мегирад.

Таҳияи Мутриба ТӮЙЧИЗОДА