Бо мақсади муҳокимаи ҳамкориҳои дуҷониба дар толори маҷлисгоҳи Кумитаи рушди сайёҳии назди Ҳукумати Ҷумҳурии Тоҷикистон вохӯрии раиси Кумита Камолиддин Муминзод бо Флориан Ван дер Беллен, мудири раёсати рушди маконҳои сайёҳии ширкати “PKF Hospitality Group” баргузор гардид.

Дар ин бора аз дафтари матбуоти Кумитаи рушди сайёҳии назди Ҳукумати Ҷумҳурии Тоҷикистон хабар доданд.

Ба иттилои манбаъ, зимни мулоқот атрофи масъалаҳои густариши муносибатҳои дуҷониба дар соҳаи сайёҳӣ, омӯзиши таҷрибаи бойи ширкати мазкур ва ҷалби сармоягузорӣ дар ин самт табодули афкор карданд.

Қобили зикр аст, ки ширкати сайёҳии “PKF Hospitality Group” яке аз ширкатҳои сайёҳии шинохта дар ҷаҳон ба ҳисоб рафта, дар самти ироаи хадамоти машваратӣ дар тарҳҳои сайёҳӣ ва фароғатӣ бо бахшҳои давлатӣ ва хусусии кишварҳои гуногуни дунё ҳамкорӣ менамояд.

Ширкати мазкур айни ҳол дар самти рушди маконҳои сайёҳӣ (Destination Managment) фаъолият намуда, дар кишварҳои Қафқози Ҷанубӣ – Арманистон, Гурҷистон ва Озарбойҷон баъзе тарҳҳои сайёҳиро татбиқ намуда, таҷрибаи ҳамкорӣ бо кишварҳои пасошуравиро дорад.

Наҷиба МУРОДБЕКОВА, “ҶТ”