Пӯшида нест, ки имрӯзҳо ҷиҳати рушди соҳаи сайёҳӣ аз ҷониби идораҳои дахлдор чорабиниҳои гуногун баргузор гардида, вазъи имрӯзу дирӯзи соҳаи сайёҳии кишвар мавриди таҳлилу баррасӣ қарор мегирад. Аз ҷумла, бо ташаббуси Кумитаи кор бо ҷавонон ва варзиши назди Ҳукумати ҷумҳурӣ, 4 маи соли ҷорӣ дар Кумитаи миллии олимпии Тоҷикистон мизи мудаввар таҳти унвони “Нақши Пешвои миллат дар муаррифии имкониятҳои сайёҳӣ” бахшида ба “Соли рушди сайёҳӣ ва ҳунарҳои мардумӣ” доир гардид.

Дар он намояндагони Кумитаи кор бо ҷавонон ва варзиш, Вазорати фарҳанг, Кумитаи рушди сайёҳӣ, Иттифоқи ҳунармандони Тоҷикистон ва Ассотсиатсияи ширкатҳои туристии Тоҷикистон иштирок доштанд, вобаста ба масоили сайёҳӣ ва нақши Пешвои миллат дар рушди соҳаи мазкур суханронӣ намуданд.

Аҳмадзода Дилноза, муовини раиси Кумитаи кор бо ҷавонон ва варзиш, зимни ифтитоҳи мизи мудаввар доир ба соҳаи сайёҳӣ андешаронӣ намуда, аз ҷумла афзуд:

- Соҳаи сайёҳӣ давоми солҳои охир яке аз соҳаҳои сердаромади иқтисодиёт ба шумор рафта, дар аксарияти давлатҳои ҷаҳон ба таъмини шуғли аҳолӣ ва таъсиси ҷойҳои кории иловагӣ мусоидат намуда, ба иқтисодиёт таъсири мусбат мерасонад. Боиси ифтихор аст, ки дар партави сиёсати хирадмандонаи Пешвои миллат, ба масъалаҳои инкишофи соҳаи сайёҳӣ ва танзими давлатии он таваҷҷуҳи хосса зоҳир гардидааст. Зеро маҳз Президенти ҷумҳурӣ ҳамчун муаррифгари Ҷумҳурии Тоҷикистон бо эълони сиёсати “дарҳои боз” равобити байналмилалии мамлакатро тақвият бахшиданд ва ин сиёсат имрӯз низ бо муваффақият идома дорад. Ҳамин аст, ки ҷомеаи ҷаҳонӣ кишвари моро чун яке аз давлатҳои орому осуда ва зебоманзар мешиносанд.

Бояд тазаккур дод, ки тибқи арзёбии созмонҳои бонуфузи байналмилалӣ ҳоло Тоҷикистон аз лиҳози низоми содаи гирифтани раводиди навъи сайёҳӣ дар руйхати панҷ кишвари пешсафи ҷаҳон мавқеи чорумро ишғол менамояд. Аз моҳи июни соли 2016 бошад, тартиби электронии раводиди Тоҷикистон баҳри таъмини ташрифоти бештари сайёҳон ба кишвар оғоз гардид.

Дар ин радиф баланд бардоштани сатҳи хизматрасонии сайёҳӣ, эътироф гардидани соҳаи сайёҳӣ ҳамчун соҳаи афзалиятноки иқтисодиёти мамлакат, аъзо гардидани Тоҷикистон ба Созмони умумиҷаҳонии сайёҳӣ, қабул гардидани қонунҳои Ҷумҳурии Тоҷикистон дар бораи туризм ва рушди сайёҳии дохилӣ, эътироф гардидани баъзе минтақаҳои кишвар ҳамчун минтақаҳои истироҳатӣ ва сайёҳӣ боиси ба вуҷуд омадани сиёсати ҳуқуқии сайёҳӣ дар кишвар гардид.

Ҳабибулло Амирбекзода, муовини аввали раиси Кумитаи рушди сайёҳии назди Ҳукумати кишвар, вобаста ба нақши Пешвои миллат дар рушди соҳаи сайёҳӣ ва таваҷҷуҳ ба он суханронӣ намуда, иброз дошт, ки таъсис ёфтани Кумитаи рушди сайёҳии назди Ҳукумати ҷумҳурӣ ва эълон гардидани “Соли рушди сайёҳӣ ва ҳунарҳои мардумӣ” намунаи олии таваҷҷуҳи Президенти мамлакат ба соҳаи сайёҳист.

- Нақши Пешвои миллат дар рушди соҳаи сайёҳӣ хеле бузург аст. То имрӯз Пешвои миллат аллакай Тоҷикистонро ҳамчун давлати сайёҳӣ ва ҳамчун кишвари амнтарин тавонистанд, ки ба ҷаҳониён муаррифӣ созанд. Кумитаи рушди сайёҳӣ дар партави сиёсати пешгирифтаи Пешвои миллат аз лаҳзаҳои аввали таъсисёбӣ тамоми кӯшишҳоро барои рушди соҳа, ҷалби бештари сайёҳони дохилию хориҷӣ ба кишвар равона сохтааст. Дар ин муддат хатсайрҳои муайяни сайёҳиро таҳия намудем ва аз оғози сол аллакай зиёда аз 20 ширкати сайёҳиро ба қайд гирифтем, ки дар умум 105 ширкат ба қайд гирифта шудааст. Ҳоло дар якҷо бо ин ширкатҳо тавонистем, ки захираҳои сайёҳии Тоҷикистонро дар дохил ва хориҷи кишвар муаррифӣ намоем. Дар ин давра мо тавонистем, ки портали сайёҳии кумитаро омода намоем, ки имрӯз бо се забон – тоҷикӣ, русӣ ва англисӣ пешниҳод карда шудааст. Инчунин боз ба нақша гирифтаем, ҷиҳати муаррифии бештари имкониятҳои сайёҳии кишвар ин сомонаро боз бо забонҳои хитоӣ, фаронсавӣ, испанӣ ва арабӣ тарҷума намоем, - гуфт Ҳабибулло Амирбекзода.

Лозим ба ёдоварист, ки дар Паёми навбатии Президенти мамлакат таъкид гардид, ки барои устувор гардидани заминаи меъёрӣ-ҳуқуқии соҳаи сайёҳӣ, инкишофи намудҳои гуногуни соҳа, таъсиси инфрасохтори зарурӣ бояд стратегияи рушди сайёҳӣ барои давраи то соли 2030 омода гардад. Хушбахтона, имрӯз стратегияи мазкур аз ҷониби масъулини соҳа ва ҳамзамон аз ҷониби мутахассисоне, ки имрӯз дар Кумитаи рушди сайёҳии назди Ҳукумати ҷумҳурӣ кору фаъолияти самарабахш доранд, таҳия гардида, мавриди хулосабардорӣ ва тасдиқи Ҳукумати кишвар қарор дорад.

Умуман, имрӯз соҳаи сайёҳӣ дар кишвар рӯ ба рушд буда, далели ин гуфтаҳо бунёд гардидани меҳмонхонаҳои гуногуни мутобиқ ба меъёрҳои сатҳи ҷаҳонӣ, зиёд гардидани мавзеъҳои тамошобоби сайёҳӣ ва рушду такмил ёфтани инфрасохтори зарурӣ дар соҳаи мазкур мебошад. Шумораи сайёҳони ба ҷумҳурӣ ташрифоваранда, дар ҳоли афзоиш буда, сол то сол теъдоди онҳо меафзояд. Дар ин ҷараён дар асоси Консепсияи миллии рушди соҳаи сайёҳӣ Тоҷикистон бояд то соли 2020 зиёда аз 1 миллион сайёҳро ба кишвар қабул намояд, ки ин худ бозгӯи рӯ ба рушд будани соҳаи сайёҳӣ дар кишвар хоҳад буд.