САЙЁҲӢ
Душанбе 19 Ноябр 2018 06:09
685
Имрӯз дар доираи намоишгоҳи ITB Berlin ҳамоиши ширкатҳои туристии ҳавзаи Роҳи Абрешим доир гашт. Намояндагони ширкатҳо табодули таҷриба карда, мушкилоту пешрафтҳои соҳаи туризмро баррасӣ намуданд. Ҳамчунин, китоби сайёҳи олмонӣ, хонум Дагмер Шрейбер бо номи “Тоҷикистон”, ки бо забони олмонӣ таълиф шудааст, муаррифӣ шуд.

Дар китоби мазкур омадааст, ки Тоҷикистон кишвари дорои баландтарин, бузургтарин ва ҷолибтарин диданиҳо ба ҳисоб меравад. Кӯҳҳои сарбафалаки барфпӯш, обанборҳои бузурги ба мисли парӣ хуфта, пиряхҳои дарозтарин ва либосҳои рангоранги хонумони қашанги ин сарзамин аз ҷумлаи ормонҳои як нафар сайёҳи мағрибӣ ба ҳисоб меравад.

Шилдироси дарёчаҳо дар қаъри дараҳои сабзу зебо ва кӯлҳои сокит, кӯҳҳои сабзпӯшу теппаҳои гулафшон ва ё биёбонҳои сарди бе долу дарахт, шаҳрҳои сабзу бозорҳои фаровони серодам ва баландиҳои пурасрору аз панҷаи саноатикунонӣ дурмонда, хоси Тоҷикистон буда, ба кас оромии рӯҳу равон ва қуввати ҷисму ҷон ато менамояд. Заминаи хубу кофӣ, то кас борхалтаро ба пушт партофта, озими Тоҷикистон гардад.

Табиати ин кишвар бемислу монанд буда, мафҳуми вақт дигар гуна фаҳмида мешавад. Кишваре, ки чӣ табиати он ва чӣ ҳаёти иҷтимоӣ ва иқтисодиаш ҳар лаҳза ва ҳар соат дар ҳоли тағйирёбӣ буда, вохӯрӣ бо одамони наҷибу мухталиф ва ба кас эҳсоси худӣ ва фаромушношуданӣ ато мекунад. Cайёҳе дар ёддоштҳои худ чунин нигошта буд: «Ҳамагуна Роҳнамо (путеводитель) оид ба кишварҳои Осиёи Марказӣ чун Тоҷикистон ҳанӯз қабл аз роҳ ёфтанаш ба бозорҳо кӯҳна мегардад, зеро ҳаёт дар кишварҳои ин минтақа тағйирёбанда ва дар ҳоли рушд аст».

Ин аст, ки нашриёти Трешер Ферлаги Олмон (Trescher Verlag) китоби хонум Дагмар Шрейбер - Роҳнамои сайёҳ роҷеъ ба имкониятҳо ва захираҳои ғании туристии Тоҷикистонро таҳти унвони «Тоҷикистон» пешкаши ҳаводорони олмонизабон намуд. Китоб дар ҳаҷми 448 саҳифа омода гардида, дар он 282 адад расмҳои ранга ва 20 харитаи ҷуғрофӣ ҷой дода шудаанд. Дар изҳороти матбуотии нашриёт, аз ҷумла чунин гуфта шудааст: «Тоҷикистон бо кӯҳҳои баланди худ дар доираҳои сайёҳии Аврупо ҳамчун “Швейтсарияи Осиёи Марказӣ” ҳисобида мешавад.

Китоби тозаэҷоди хонум Дагмар Шрейбер Тоҷикистонро дар доираҳои сайёҳии Олмон ва ҷаҳон муаррифӣ хоҳад кард.


Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 1 2

Ноябр 2018 c.