Дар Кумитаи ҷавонон, варзиш ва сайёҳӣ муовини раиси кумита Ризо Назарзода бо таҷрибаомӯзони Донишгоҳи давлатии Қӯрғонтеппа ба номи Носири Хусрав, ки дар риштаи туризм таҳсил мекунанд, мулоқот кард.

Мақсад аз баргузории вохӯрӣ бештару беҳтар кардани тарғибу ташвиқи захираҳои туристии Тоҷикистон, ҷалб намудани ҷавонон ба соҳаи туризм ва омодасозии кадрҳои соҳа, алалхусус роҳбаладҳо дар шароити кӯҳӣ дар макотиби таҳсилоти олии касбӣ, масъалаҳои қабул ва пешкаш кардани хизматрасонии муносиб ба туристони хориҷӣ гуфта шуд.

Ризо Назарзода иброз дошт, ки яке аз масъалаҳои мубрами соҳа норасоии мутахассисони ихтисосманди техникии соҳаи туризм, алахусус роҳбаладон мебошад. “Таҳлилҳо нишон медиҳанд, ки бо вуҷуди таъсис ёфтани бахшҳои омодасозии кадрҳои соҳаи туризм дар бештар аз 10 макотиби таҳсилоти олӣ ва миёнаи кишвар, дараҷаи дониши кадрҳои хатмкунандагон ба талаботи бозори соҳа ҷавобгӯ нест. Кам будани мутахассисони соҳибихтисоси соҳа барои расонидани хизматрасонии муносиб ба шумораи афзоишёбандаи туристони хориҷӣ имкон намедиҳад”.

Зикр шуд, ки Кумитаи ҷавонон, варзиш ва сайёҳӣ дар якҷоягӣ бо бахшҳои худ дар маҳал ва ширкатҳои туристӣ барои гузаронидани таҷрибаомӯзии донишҷӯён ҳаматарафа омодааст ва ба талаботи муосир мутобиқ намудани барномаҳои таълимии марбут ба соҳаи туризм ва мубодилаи таҷрибаи омӯзгорони муассисаҳои таълимии ҷумҳурӣ бо ҳамкасбон аз дигар макотиби олии давлатҳои дар соҳаи туризм пешрафта тадбирҳои зарурӣ андешида истодааст.

Бояд қайд кард, ки кумита дар доираи маблағҳои Барномаи рушди туризм дар Ҷумҳурии Тоҷикистон дар давраи солҳои 2015-2017 ба муассисаҳои таълимии дахлдор ва таъминоти адабиёти муосири соҳа мусоидат менамояд.