Кумитаи ҷавонон, варзиш ва сайёҳӣ аз 28 марти соли ҷорӣ сар карда давоми сол баргузории презентатсияҳоро оид ба мафҳум ва моҳияти соҳаи туризм миёни муассисаҳои таҳсилоти миёнаи умумии шаҳри Душанбе ва дигар манотиқи кишвар, барномаи эҳё ва рушди туризми мактабиро оғоз намуд.

Воқеан, соҳаи туризм ба донистани таъриху фарҳанг, расму оин, мавзеъҳои табиии рекреатсионӣ ва забондонӣ робитаи мустаҳкам дорад.
Дар ҷаҳони имрӯза дар баробари пешравии ҷомеа, тараққиёти босуръати илму техника, иқтисоди бозоргонӣ касбҳои наву ҷавобгӯи талаботи давру замон ба миён меоянд, ки яке аз онҳо туризм ба ҳисоб меравад.

Саноати туристии замони муосир, яке аз соҳаҳои рушдёбанда ва сердаромади иқтисоди ҷаҳонӣ арзёбӣ мегардад.

Шумораи ҷойҳои корӣ дар соҳаи туризм тақрибан 200 миллион ё беш аз 8 фоизи  нишондиҳандаҳои умумии шуғли аҳолии ҷаҳонро ташкил медиҳад.

Бинобар ин, босифат ташкил намудани чорабиниҳои тарғиботӣ оид ба интихоби дурусти касб, инчунин тайёр кардани мутахассисони ихтисосманди соҳа ва васеъ намудани усулҳои меҳмоннавозӣ, саҳмгузорӣ дар беҳтар намудани сифати хизматрасониҳо, барои мустаҳкам кардани имиҷи ҷумҳурӣ ҳамчун кишвари туризми байналмилалӣ, мусоидат менамоянд.

Ҳамзамон, рушди туризми дохилӣ ва ҷалби оммаи васеи мардум ба он ба беҳтар гардонидани сифати зиндагии мардум мусоидат менамояд.