САЙЁҲӢ
Якшанбе 11 Апрел 2021 11:53
1470
3-юми сетябр дар МД «Боғи Ирам»-и пойтахт бо ибтикори Кумитаи ҷавонон, варзиш ва сайёҳии назди Ҳукумати ҷумҳурӣ ва Вазорати меҳнат, муҳоҷират ва шуғли аҳолӣ Фестивали байналмилаии фарҳангиву сайёҳии мероси Роҳи Абрешим таҳти унвони «Рангоранг» ва озмуни ҷумҳуриявии ҳунарҳои мардумӣ доир гардид. 



Дар он барои меҳмонону сокинони пойтахт ҳунармандони вилоятҳои Суғд, Хатлон, Мухтори Кӯҳистони Бадахшон, ноҳияҳои тобеи марказ ва шаҳри Душанбе намунаи ҳунарҳои дастии худ, ба монанди зардӯзӣ, кандакорӣ, бофандагӣ, ресандагӣ, таомҳои миллӣ, ҳунарҳои мурдумиро ба намоиш гузоштанд. Намояндагони сафоратҳои кишварҳои хориҷӣ, ки дар Тоҷикистон ҳастанд, аз ҷумла, Афғонистон, Покистон, Чин, Қирғизистон, Ҳиндустон, Русия, Қазоқистон, Озарбойҷон, Ҷопон низ ҳунарҳои мардумӣ ва таомҳои миллии хешро пешниҳод намуданд.



Баҳри болидарӯҳии меҳмонон ва сокинони кишвар барномаи фарҳангӣ низ пешниҳод шуд. 

Дар ифтитоҳи ҳамоиши фарҳангӣ Тағойзода Сумангул Саид, вазири меҳнат, муҳоҷират ва шуғли аҳолӣ ҳозиринро ба муносибати 25-солагии Истиқлолияти давлатии Тоҷикистон таҳният гуфта, иброз дошт, ки бо шарофати хирадмандона ва сулҳофари Пешвои миллат, муҳтарам Эмомалӣ Раҳмон ҷаҳониён миллати моро ҳамчун сулҳдӯсту покҷавҳар, бунёдкору созанда ва соҳибмаърифату соҳибфарҳанг мешиносанд. Маҳорати нотакрори ҳунармандон бошад, миллатамонро шуҳратёри ҷаҳон гардонидааст. “Солҳои охир Ҳукумати кишвар ба омода кардани кадрҳои коргарӣ, эҳё ва ҳунарҳои мардумӣ таваҷҷуҳи хоса зоҳир менамояд. Оид ба рушди ҳунарҳои мардумӣ, муаррифии касбу ҳунарҳои миллӣ ва иҷрои нақшаи чорабиниҳо вобаста ба ташкил ва баргузории озмуну мусобиқа, чорабиниҳои фарҳангӣ бахшида ба 25-солагии Истиқлолияти давлатии Тоҷикистон аз тарафи Вазорати меҳнат, муҳоҷират ва шуғли аҳолӣ дар ҳамкорӣ бо мақомоти иҷроияи маҳалли ҳокимияти давлатии вилоят ва шаҳру ноҳияҳои ҷумҳурӣ озмунҳои ҷумҳуриявии ҳунарҳои мардумӣ, заргару гулдӯзи беҳтарин баргузор шудаанд. Имрӯз бошад, дар баргузории даври ниҳоии он имрӯз мову шумо қарор дошта, шоҳиди иди ҳунару ҳунармандӣ дар ин боғи зебо ва боҳашамат гардида истодаем, ки боз як қадами устувор барои муаррифии ҳунарҳои мардумӣ ва эҳёи фарҳанги миллӣ мебошад. Дар озмуни мазкур беҳтарин ҳунармандон аз вилоят ва шаҳру ноҳияҳои ҷумҳурӣ, ҳамчун ғолибони даври якум ва дуюми озмунҳо иштирок доранд, ки ҳунари волои худро ба тамошо гузоштаанд. Бовари комил дорам, ки ғолибони озмунҳои имрӯза бо баҳогузории одилона ва шаффоф муайян шуда, онҳо дар оянда барои муаррифии ҳунару фарҳанги халқу миллати тоҷик дар ҷаҳон саҳми босазо мегузоранд”, - гуфт С. Тағойзода.

Зикр гардид, ки аз соли 2014 дар миқёси ҷумҳурӣ, дар муассисаҳои таълимии системаи вазорат зиёда аз 24 ҳазор нафар ба омӯзиши атласу адрасбофӣ, қолинбофӣ, кӯроғбофӣ, бофандагӣ, гулдӯзӣ, зардӯзӣ, заргарӣ, сӯзанидӯзӣ ва дигар ҳунарҳои мардумӣ ҷалб карда шудаанд. Инчунин, ҷиҳати таҳким бахшидан ба фаъолият дар ҷодаи рушди ҳунарҳои  мардумӣ дар аксар минтақаҳои мамлакат марказҳои таълимии истеҳсолӣ низ таъсис ёфтанд. Имрӯзҳо танҳо дар шаҳру ноҳияҳои ҷумҳурӣ бо мақсади омӯзиши атласу адрасбофӣ 159 марказ таъсис ёфтааст, ки бо 458 дастгоҳ муҷаҳҳаз мебошанд. Дар ин марказҳои таълимии истеҳсолӣ зиёда аз 21 ҳазор метр адрас ва атлас истеҳсол шудааст ва ҳамаи он ба фурӯш рафтаанд. 

Аҳтам Абдуллозода, раиси Кумитаи ҷавонон, варзиш ва сайёҳӣ зимни суханронӣ минатдории худро ба ҳунармандон, дасткорон ва онҳое, ки бевосита дар баргузории Фестевали фарҳангию сайёҳӣ ва намоиши ҳунарҳои дастӣ саҳм гузоштанд, расонида, қайд кард: “Баргузории Фестевали байналмилалии фарҳангию сайёҳии мероси Роҳи Абрешим “Рангоранг” ва даври ниҳоии озмуни ҳунарҳои дастӣ дар пешорӯи баргузории ҷашни Истиқлолияти давлатӣ, баҳри аз нигоҳи нав муаррифӣ кардани миллати тоҷик дар арсаи байналмилаӣ ва ба ин васила такон бахшидан ба ҳунари миллӣ ва рушди зеҳнии ҷавонон саҳми босазо дорад. Фестивали сайёҳию фарҳангии “Рангоранг” ҳамчун як василаи муҳими рушди соҳаи сайёҳӣ дар кишвар ба ҳисоб рафта, ба ин соҳа як такони ҷиддӣ мебахшад. Аз намошҳои ҳунарҳои мардумӣ маълум гардид, ки инсон чӣ қадар иқтидори баланди зебоиофарӣ ва офариниш дорад. Имрӯз мо шоҳиди он гаштем, ки инсон худаш танҳо метавонад бо ҳунари воло дили чандин ҳазор одамро тасхир намояд. Ҳамзамон мо шоҳид гаштем, ки миллати тоҷик дар асл миллати фарҳангсолор, тамаддунофар ва башардӯст аст, ки бо фарҳанги воло ва санъати нотакрор метавонад дар арсаи байналмилалӣ муаррифгар бошад”. 

Ҳайати ҳакамон ғолибони озмуни ҷумҳуриявии “Ҳунарҳои мардумӣ”-ро аз рӯйи се номинатсия: “Заргарӣ”, “Гулдӯзӣ ва зардӯзӣ”, “Адрасбофӣ, атласбофӣ ва қолинбофӣ” чунин муайян кард:

Заргари беҳтарин 
Ҷойи якум – вилояти Хатлон.
Ҷойи дуюм – шаҳри Душанбе.
Ҷойи сеюм – вилояти Суғд.

Гулдӯзӣ ва зардӯзӣ: 
Ҷойи якум - шаҳри Душанбе.
Ҷойи дуюм - ВКМБ.
Ҷойи сеюм - ноҳияи Шаҳринав.

Адрасбофӣ, атласбофӣ ва қолинбофӣ:
Ҷои якум – вилояти Суғд.   
Ҷои дуюм - ноҳияи Ҳисор.
Ҷои сеюм - ноҳияи Абдураҳмони Ҷомии  вилояти Хатлон.

Ба ғолибон “Ифтихорнома” ва тӯҳфаҳои хотиравӣ такдим карда шуд.


















Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 1 2

Апрел 2021 c.