САЙЁҲӢ
Душанбе 22 Октябр 2018 07:37
4883
Яке аз самтҳои муҳими пешрафти иқтисодиву иҷтимоии мамлакат ин баланд бардоштани сатҳу сифати хизматрасонӣ дар соҳаи сайёҳӣ мебошад. Маҳз рушди сайёҳӣ муаррифгари тамаддуну фарҳанги миллии мо дар арсаи ҷаҳонӣ мебошад. Суханони Президенти кишвар муҳтарам Эмомалӣ Раҳмон шаҳодати ин гуфтаҳост: “Муҳайё намудани шароити хуби хизматрасонӣ дар мавзеъҳои истироҳативу фароғатии кишвар, истифодаи самараноки захираҳои табиӣ, муаррифии шоистаи табиати зебо ва пеш аз ҳама, таъмини сулҳу оромӣ дар кишвар имкон медиҳанд, ки кишвари мо дар як муддати кӯтоҳ дар қатори мамлакатҳои аз ҷиҳати қабули сайёҳон пешрафтаи олам мақоми арзандаи худро пайдо намояд”.

Туризм дар бисёр кишварҳои ҷаҳон яке аз соҳаҳои тараққикардаву фоидаовар ба шумор меравад. Имрӯзҳо Тоҷикистон низ ба як минтақаи сайёҳӣ мубаддал гардида, дорои мавзеъҳои нодири тиббиву муолиҷавӣ, кӯҳнавардиву варзишӣ ва ғайра мебошад. Он дар мамлакати мо соҳаи нисбатан нав ба ҳисоб рафта, аз рӯи хусусиятҳои хосаш аз дигар соҳаҳо фарқ мекунад.

Дар мамлакат минтақаҳои сайёҳӣ зиёданд, ки онҳо аз даврони истиқлолият ҳамчун минтақаҳои сайёҳӣ шинохта шудаанд. Яке аз ин минтақаҳои сайёҳӣ дар шаҳри Ваҳдат ҷойгир шудааст. Шаҳри Ваҳдат яке аз шаҳрҳои пешрафта ва минтақаи сайёҳии кишвар ба шумор рафта, бо табиат ва иқлими мусоиди худ дорои ҷойҳои истироҳатию фароғатӣ ва табобатӣ аз қабили дараи Ромит, Мамнӯъгоҳи Ромит, гармчашмаи шифобахши “Зайрон”, оби шифобахши “Шӯр”, базаҳои сайёҳӣ ва ғайра мебошад, ки дар ҳудуди онҳо мавзеъҳои табобатию сайёҳӣ бисёранд ва тӯли сол дар хизмати шаҳрвандони кишвар ва сайёҳони берун аз кишвар ҳастанд.

Дараи сайёҳиву истироҳатии Ромит дар миёни дигар минтақаҳои Тоҷикистон ҷойи намоёнро ишғол намуда, соли 1959 бо қарори Ҳукумати Шӯравӣ ташкил карда шудааст ва он аз 18 сентябри соли 2000-ум бо қарори Ҳукумати Ҷумҳурии Тоҷикистон “Дараи Ромит минтақаи сайёҳию истироҳатии Тоҷикистон” эълон гардидааст. Мувофиқи маълумотҳо дараи Ромит дар паҳнои 16 200 гектар замин доман густурда, дар “Мамнӯъгоҳи давлатии табии Ромит” муттаҳид карда шудааст ва то 50 километр тӯл дорад. Ин дара дар самти Шарқ ба Обигарм ва аз тариқи дараи Канаск ба дараи Камароби ноҳияи Рашт, дар Ғарб аз тариқи Роҳатӣ ва теппаи Самарқандӣ ба дараи Варзоб ва аз он тараф то марзи Регар бо Ӯзбекистон, инчунин дар самти Шимол ба навоҳии Айниву Мастчоҳи вилояти Суғди Тоҷикистон роҳ дорад.

Дараи хушманзараи Ромит дар болооби дарёи Кофарниҳон ҷойгир буда, номашро аз номи деҳаи зебои Ромит гирифтааст. Дар дараи мазкур меҳмонхонаву тарабхонаҳои замонавӣ ва чойхонаҳои миллӣ сохта шудаанд, ки дар давоми сол метавонанд садҳо сайёҳони дохилӣ ва хориҷиро қабул намоянд. Гармчашмаи шифоии “Зайрон” низ дар ҳамин дара ҷойгир аст, ки мисли дигар гармчашмаҳои ҷумҳурӣ маълуму машҳур аст. Ин оби шифобахш барои табобати дарди миёну пой, буғумҳо хеле муфид аст.

Дар ин минтақа гармхонаҳои тобистона, фабрикаи парандапарварӣ, заводи консервабарорӣ, идораи занбӯри асалпарварӣ, хоҷагиҳои ҷангали Кофарниҳон, Ромит, якчанд истироҳатгоҳҳои корхонаву идораҳои давлатӣ ва ғайра ҷойгиранд.

Ҳамасола дар дараи Ромит лагерҳои истироҳатии тобистона ба монанди “Ҳамсафар”, “Афсонаи кӯҳӣ”, “Кайҳон”, “Булбулакон”, “Явроз” ва ғайра фаъолият менамоянд, ки аз тамоми гӯшаҳои мамлакат наврасон аз оилаҳои камбизоат, кӯдакони болаёқат, ҷавонон аз корхонаҳо ва кумитаҳои гуногун барои истироҳат фаро гирифта мешаванд.

Ҳангоме ки аз ин мавзеъ дидан менамоем, зебогии кӯҳу даман ва табиати зебо ва нотакрори онро эҳсос мекунем. Обҳои зулоли ин минтақа ба кас рӯҳу илҳоми тоза бахшида, манзараҳои он диққати шахсро ба худ ҷалб мекунанд.

Воқеан, дараи Ромит рӯз то рӯз ба як минтақаи сайёҳию истироҳатӣ ва табобатии замонавӣ мубаддал гардида, барои рушду пешрафти иқтисодиву иҷтимоии мамлакат, алалхусус баланд бардоштани сатҳи зиндагии аҳолӣ мусоидат менамояд.

Фарида КАРИМОВА, донишҷӯи факултети журналистикаи ДМТ

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31 1 2 3 4

Октябр 2018 c.