Имрӯз - 30 сентябр дар шаҳри Душанбе мулоқоти Раиси Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон Сулаймон Давлатзода бо Тавфиқ ибни Фавзон ар-Рабиъа, вазири ҳаҷ ва умраи Шоҳигарии Арабистони Саудӣ баргузор гардид.

Ин вохӯрӣ дар доираи таҳкими ҳамкориҳои дуҷониба ва рушди робитаҳои динию фарҳангӣ ва сайёҳӣ байни Тоҷикистон ва Арабистони Саудӣ сурат гирифт.

Дар ҷараёни мулоқот ҷонибҳо як қатор масъалаҳои муҳим, аз ҷумла беҳтар кардани шароитҳо барои зоирони тоҷик дар раванди адои ҳаҷ ва умра, табодули таҷриба дар самти истифодаи технологияҳои рақамӣ дар ташкилу танзими сафари ҳаҷ, инчунин, густариши ҳамкориҳо дар самти тарғиби имкониятҳои сайёҳии ду кишварро баррасӣ намуданд.

Раиси Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон Сулаймон Давлатзода изҳор дошт, ки Кумитаи дин, танзими анъана ва ҷашну маросим омода аст, дар ҳамкорӣ бо мақомоти марбутаи Шоҳигарии Арабистони Саудӣ барои омода кардани шароит ҷиҳати адои яке аз рукнҳои дини Ислом чароҳои зарурӣ андешад.

Ӯ ҳамчунин қайд намуд, ки ҳарду кишвар зарфиятҳои бузурги истифоданашуда дар самти ҷалби мубодилаи сайёҳонро доро мебошанд.

Аз тарафи худ Тавфиқ ибни Фавзон ар-Рабиъа изҳори омодагӣ намуд, ки Шоҳигарии Арабистони Саудӣ ҳамеша омода аст, то шароити арзандаро барои зоирони тоҷик фароҳам орад ва ба рушди ҳамкориҳои мутақобилан судманд на танҳо дар соҳаи ҳаҷ ва умра, инчунин дигар соҳаҳои афзалиятноки ду кишвар саҳмгузор бошад.

Фарзонаи УМАРАЛӢ, “ҶТ”