Кумитаи ҷавонон, варзиш ва сайёҳии назди Ҳукумати ҷумҳурӣ  шурӯъ аз 3 апрели соли ҷорӣ дар “Боғи Ирам”-и  шаҳри Душанбе ҳар ҳафта рӯзҳои шанбе якшанбе то охири соли 2016, дар якҷоягӣ бо вазорату идораҳои дахлдори кишвар, мақомотҳои иҷроияи ҳокимияти давлатии шаҳру ноҳияҳои ҷумҳурӣ ва муассисаҳои олии таълимӣ бахшида ба 25-солагии Истиқлолияти Тоҷикистон силсила-чорабиниҳои фарҳангиро баҳри ғанӣ гардонидани маънавиёти сокинони пойтахт, махсусан наврасону ҷавонон баргузор мекунад.

Ҳамзамон дар баробари дигар чорабиниҳои фарҳангӣ-фароғатӣ гӯшаи туристӣ барои дӯстдорони сайру саёҳат ва намоиши маҳсули ҳунармандони кишвар, аз ҷумла армуғонҳо барои сайёҳон пешниҳод карда мешаванд.

Мақсад аз гузаронидани ин чорабиниҳо, мусоидат намудан ба устувории рушди туризм, муаррифии имкониятҳои туризми дохилӣ, беҳтар намудани сифати хизматрасониҳо, ҷалби таваҷҷӯҳи доираи васеи мардум ба соҳаи сайёҳӣ, фаъол гардонидани хатсайрҳои туристӣ, дарёфти истеъдодҳои нав, чеҳраҳои ҷавон ва ба ин васила тақвият додани ҳисси ватандӯстиву худшиносии миллӣ, бедор намудани ифтихори ватандорӣ дар ниҳоди ҷавонон  мебошад.