Дар Кохи Рӯдакии маркази вилояти Суғд бахшида ба Рўзи умумиҷаҳонии сайёҳӣ конфронси илмӣ-амалӣ таҳти унвони “Сайёҳӣ ва хизматрасонӣ: ҳолати муосир ва тамоюли рушд” доир шуд.

Конфронсро Анвар Яъқубӣ, муовини Раиси вилояти Суғд ифтитоҳ намуда, зикр кард, ки маҳз бо ташаббуси Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади рушди соҳаи сайёҳӣ, муаррифии шоистаи имкониятҳои сайёҳии мамлакат, ҷалби сармоя ба инфрасохтори соҳа, соли равон “Соли рушди сайёҳӣ ва ҳунарҳои мардумӣ” эълон карда шуд.

Гуфта шуд, ки мақомоти иҷроияи ҳокимияти давлатии вилоят якҷоя бо шаҳру ноҳияҳо, ширкатҳои сайёҳӣ, ташкилотҳои ҷамъиятӣ, бахши хусусиву соҳибкорӣ ва дигар сохторҳои дахлдори соҳавӣ ҷиҳати татбиқи босамари Барномаи рушди сайёҳӣ барои солҳои 2018-2020, Нақшаи чорабиниҳои “Соли рушди сайёҳӣ ва ҳунарҳои мардумӣ”, стратегияи рушди сайёҳӣ дар Ҷумҳурии Тоҷикистон барои давраи то соли 2030 ҳамкориҳои судмандро роҳандозӣ намуда, ҷиҳати рушди инфрасохтори соҳаи сайёҳӣ, баланд бардоштани сатҳу сифати хизматрасонӣ ва ба шуғл фаро гирифтани аҳолӣ чораҳои зарурӣ меандешад. Аз ҷумла, бо қарори дахлдори Раиси вилоят моҳи апрели соли ҷорӣ дар сохтори мақомоти иҷроияи ҳокимияти давлатии вилоят шуъбаи рушди сайёҳӣ ва дар шаҳрҳои Истаравшан, Исфара ва Панҷакент бахшҳои рушди сайёҳӣ таъсис дода шуданд, ки он баҳри амалисозии сиёсати давлатӣ дар бахши сайёҳӣ дар маҳалҳо ҳамаҷониба мусоидат менамояд.

Дар вилояти Суғд 24 ширкати сайёҳӣ, аз ҷумла Ассотсиатсияи рушди сайёҳии Зарафшон ва ташкилоти ҷамъиятии Шўрои рушди сайёҳӣ фаъолият дошта, инчунин дар ҳудуди вилоят зиёда аз 520 ёдгорӣ ва мавзеи таърихию фарҳангӣ, 5 осорхона, 33 мавзеи табиӣ-истироҳатӣ, 13 осоишгоҳ, санаторияву курорт, 19 боғу гулгашт, 10 кўл, 30 ҳавзи моҳигирӣ, 7 минтақаи шикор, 2 чашмаи шифобахш, 68 дўкони молу маводи мардумӣ, 191 тарабхона мавҷуд буда, баҳри хизмати мизоҷон дар шаҳру ноҳияҳои вилоят зиёда аз 55 меҳмонхона фаъолият менамоянд.