Солҳои охир ба ноҳияи Балҷувон алалхусус минтақаи Сари Хосор таваҷҷуҳи сайёҳон аз кишварҳои гуногуни Ғарбу Шарқ бештар гашта истодааст. Дар соли 2014 ба ин ноҳия аз Олмон, Испания, Франсия, Австрия, Русия 74 сайёҳ ва дар соли 2015 бошад, 87 сайёҳи хориҷӣ, 3000 сайёҳи дохилӣ ва инак дар соли 2016 то имрӯз 15 сайёҳи хориҷӣ ворид шудаанд.

Таҳлилҳо муйян мекунад, ки ин нишондод нисбат ба солҳои 2012-2013 50 дарсад зиёд мебошад. Балҷувон бо шаршараи овозадори Сари Хосор, ки ба гуфтаи Шамсулло Аҳадов, собиқ мудири бахши фарҳанги ноҳия, яке аз ҳафт ганҷинаи Тоҷикистон мебошад, инчунин шаршараҳои Пушти Боғ, Камолӣ, Ҳорма маҷмӯан 200 чашма, дарахтони азимҷуссаи Ҷувозчинору Шинг, чашмаҳои шифобахши "Хибил", "Оби гӯгирд", "Шулук" ва "Оби гӯр", санги сӯрохи "Чиламазор" ва манзараҳои аҷиби табиат дили садҳо сайёҳону меҳмонон ва ҳамзамон мардумони маҳаллиро тасхир намудааст. Ғайр аз ин, ноҳия дорои ёдгориҳои таърихии қалъаҳои "Мир" ( асрҳои XVI-XIX), "Чорбоғ" (асорҳои миёна), "Тӯпхона" (асрҳои I -и пеш аз мелод то V - и мелодӣ), "Дектур" (XVIII - XIX), "Турк" (XII - XIII), "Чаноро", "Чавгонӣ", "Додӣ", бошишгоҳҳои даври асри сангин дар деҳаҳои Файзобод,

Шаҳидӣ, Бобохон, Ҷимбулоқ ва мақбараю оромгоҳи орифон, "Устухонҳо" (мавзеи сукунати ҳайвоноти азимҷуссаи қадима) ва чандин осорхонаҳои таърихиву мардумшиносӣ мебошад, ки барои роҳандозӣ ва рушди туризми фарҳангиву таърихӣ имкони фарох фароҳам меоранд. Албатта, вазъи сайёҳии ноҳия беҳбудиро тақозо дорад. Махсусан раванди бунёди меҳмонхонаву марказҳои хизматрасонии мутобиқ ба стандартҳои байналмилалӣ дар назди мавзеъҳои таърихиву табиӣ, таъмири роҳҳо ва дигар иншооти ёрирасонро бояд вусъат бахшид. Сайёҳӣ яке аз соҳаҳои даромаднок маҳсуб ёфта, давлатҳои мутараққӣ аз он маблағҳои зиёд ба даст меоранд ва барои рушди иқтисодиёти худ пурсамар истифода мебаранд.

Дар асоси ин дороиҳои ғанӣ таъсиси пойгоҳи мустаҳками туристӣ бо ҷалби мутахассисону соҳибкорон ба мақсад мувофиқ хоҳад буд. Барои ҳарчи бештар ташриф овардани сайёҳон ба ин минтақаи туристӣ корҳои мумфаршсозӣ ва таъмири роҳ аз маркази ноҳия то Сари Хосор аз ҷониби Вазорати нақлиёти ҷумҳурӣ дар арафаи оғозёбист. Тибқи дастуру супоришҳои ҳукумати ноҳия дар назар аст, ки дар давоми соли 2016 то ҷашни 25 - солагии Истиқлолияти давлатӣ дар Ҷамоати деҳоти Сари Хосор сохтмони пойгоҳи махсуси сайёҳӣ сохта ба истифода дода шавад. Ҳамчунин сохтани як пойгоҳи кӯҳнавардӣ низ ба нақша гирифта шудааст. Табиати зебо, обу ҳавои хуш, мавзеъҳои таърихиву фарҳангӣ, рустаниву чашмаҳои шифобахши Балҷувон барои инкишофи соҳаи туризм дар ноҳия имкони мусоид фароҳам овардааст.