Дар Маҷлиси намояндагони Маҷлиси Олӣ ҷаласаи навбатии гуруҳи корӣ оид ба таҳияи лоиҳаи Қонуни Ҷумҳурии Тоҷикистон “Дар бораи рушди туризми дохилӣ” доир гашт.

Бо қарори Кумита оид ба илм, маориф, фарҳанг ва сиёсати ҷавонони Маҷлиси намояндагон аз 21 декабри соли 2015 дар назди муовини Раиси Маҷлиси намояндагон аз ҳисоби мутахассисони масъули вазорату идораҳои адлия, рушди иқтисод ва савдо, фарҳанг, ҷавонон, варзиш ва сайёҳӣ, андоз, Академияи илмҳо, Донишкадаи соҳибкорӣ ва хизмат, Агентии миллии “Ховар” ва Ассотсиатсияи ташкилотҳои ёрирасон ба инкишофи рушди туризм гуруҳи корӣ таъсис дода шудааст.

Зимни таҳрири нахустини лоиҳаи Қонуни Ҷумҳурии Тоҷикистон “Дар бораи рушди туризми дохилӣ” қайд гардид, ки он аз 11 боб ва 65 модда иборат буда, тамоми муносибатҳои ҳуқуқии танзимро дар самти рушди туризми дохилӣ фаро мегирад.

Дар шароити имрӯза яке аз усулҳои муассир ва мувофиқ, бахусус барои кишварҳои рӯ ба таррақӣ чун Тоҷикистон, ин ташаккул ва рушди туризми дохилӣ ба ҳисоб меравад. Бо ин роҳ метавон дар муддати кутоҳ ва сарфаи маблағ хадамоти (инфрасохтори) зиёди туристӣ ташкил намуд ва маърифат, маданият ва фарҳанги шаҳрвандонро дар самти хизматрасонии туристӣ баланд гардонд.

Гуруҳи корӣ аз рӯи ҳар як модда назари худро баён дошта, лоиҳаро комилгашта баҳогузорӣ намуданд.