САЙЁҲӢ
Сешанбе 21 Январ 2020 01:03
6736
Сайёҳӣ дар замони муосир яке аз соҳаҳои даромаднок ба ҳисоб рафта, имрӯз тамоми кишварҳои рӯйи олам талош бар он доранд, то ин соҳаро рушд бахшанду бо ҷалби ҳарчи бештари шумораи сайёҳон манфиат ба даст оранд.

Хеле хуб аст, ки дар Тоҷикистони мо низ бо талошҳои пайвастаи Ҳукумати кишвар соҳаи сайёҳӣ рушд намуда, табиати нотакрори кишвар қалби ҳазорон нафар сайёҳони хориҷиро ба худ моил гардонидааст.

Дар баробари дигар мавзеъҳои сайёҳии кишвар шаҳри Душанбе яке аз маконҳои дидании сайёҳӣ ба ҳисоб рафта, ҳар сайёҳи хориҷие, ки азми сафар ба кишвари моро мекунад, дар навбати аввал мехоҳад, то аз ин шаҳри зебо дидан намояд.

Имрӯз дар ҳар гӯшаи Душанбешаҳр бо сайёҳони хориҷӣ вохӯрдан мумкин аст, ки бо табъи болида пайи тамошоянд. Тим Етневи 49-сола аз зумраи сайёҳонест, ки аз тамошои маконҳои сайёҳии Тоҷикистони азиз ба ваҷд омада, табиати моро нотакрору диққатҷалбкунанда медонад.

“Аз хурдсолӣ саёҳат карданро дӯст медорам ва то имрӯз ба чандин давлатҳо сафар намудаам. Бори аввал аст, ки ба Тоҷикистон омадам. Дар бораи Тоҷикистон ва мардуми он камтар маълумот доштам. Он ҳам фақат дар бораи ҷойҳои саёҳатӣ буду халос. Наздикон ва дӯстонам, ки пеш аз ман ба ин ҷо омада буданд, доир ба кишвари шумо маълумот доданд. Онҳо гуфтанд, ки пойтахти Тоҷикистон шаҳри Душанбе хиёбон ва кӯчаҳои орому зебо дорад. Рӯз ба рӯз шавқу ҳавасам барои дидани Тоҷикистон зиёд гардид ва имрӯз хеле хушнудам, ки дар ин кишвари офтобрӯям”, - гуфт Тим Етнев.

Тим Етнев шаҳрванди кишвари Англия буда, дар шаҳри Лондон муаллим шуда кор мекунад. Ин сайёҳи лондонӣ аз пазироӣ ва лутфу муҳаббати мардуми Тоҷикистон дар ҳайрат монда, чунин гуфт: “Дар фурудгоҳи байналмилалии Душанбе моро бо чеҳраи кушод пешвоз гирифтанд. Аз ободии шаҳри Душанбе кас ҳаловат мебарад. Мо ки дар арафаи Соли нав ба Тоҷикистон омадем, ҳама ҷо арчаҳои зебои идона оро дода шуда, он симои шаҳрро боз ҳам зеботар намудааст. Мушоҳида намудем, ки сайёҳон дар кӯчаҳои шаҳр озод сайру гашт мекунанд. Аз ин хеле хушнуд шудам. Ният дорам, ки боз ҷойҳои дигари таърихии Тоҷикистонро бубинам. 6 фарзанд дорам ва аз рӯзи омаданамон тариқи телефон ба онҳо дар бораи Тоҷикистон ҳарф мезанам”.

Рӯзи чорум аст, ки Тим Етнев бо ҳамроҳии завҷааш дар Тоҷикистон аст. Аз сафарашон қисса намуда, иброз дошт, ки меваҳои тару тоза ва лазизу фоиданоки ин меҳани биҳиштӣ барояш писанд омадааст. Ӯ гуфт: “Мо ба зиёрати Ҳазрати Мавлоно рафтем ва дар муддати чанд рӯзе, ки инҷоем аз таърихи бою ғании тоҷикон бохабар шудем. Ҳангоми вориди масҷиди Мавлоно шудан, дар ҳаяҷон мондам ва оромона онро тамошо кардам. Баъди дидан аз Ҳазрати Мавлоно худамро дар олами дигар эҳсос намудам. Баъди бозгашт аз Ҳазрати Мавлоно мо дар боғҳои фароғатии шаҳри Душанбе сайру гашт намуда, Парчами баландтарини дунёро аз наздик дидем. Ин сафари ман то охири умр бароям хотирмон мемонад. Дар оянда мехоҳам, боз ба Тоҷикистон биёяму маконҳои дилфиреби онро бубинам”.

Ӯ дар охир гуфт, ки Тоҷикистон барои қабули сайёҳони хориҷӣ омода буда, тамоми шароитҳои зарурӣ барои сайёҳон муҳаё мебошад. Фақат лозим аст, ки ба ин кишвари дорои табиати нотакрор биёеду аз зебоии он ҳаловат бубаред.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2

Январ 2020 c.