Бо ташаббуси Кумитаи кор бо ҷавонон ва варзиши назди Ҳукумати кишвар бахшида ба “Соли рушди сайёҳӣ ва ҳунарҳои мардумӣ” дар шаҳри Ҳисор Конференсияи ҷумҳуриявии илмӣ-амалӣ таҳти унвони “Ҳунарҳои мардумӣ:эҳё, ҳолат, рушд ва дурнамо" бо иштироки намояндагони вазорату идораҳо ва ҷавонони фаъол баргузор гардид.

Қабл аз оғози конференсия ҳайати меҳмонон аз Мамнӯъгоҳи таърихию кишваршиносии қалъаи Ҳисор дидан намуда, дар намоишгоҳи ҳунарҳои мардумии шаҳри Ҳисор ширкат варзиданд.

Зимни боздиди ҳунарҳои дастии ҳунармандони шаҳр меҳмонон ба ҳунари баланди сеҳрофари ҳунармандони Ҳисори бостонӣ аҳсан хонда, барои саҳмашон дар рушди ҳунарҳои мардумӣ изҳори сипос намуданд.

Пас аз сайри Мамнӯъгоҳи таърихию кишваршиносии қалъаи Ҳисор намояндагони вазорату идораҳо ва ҷавонони фаъоли кишвар дар Конференсияи ҷумҳуриявии илмӣ-амалӣ таҳти унвони “Ҳунарҳои мардумӣ: эҳё, ҳолат, рушд ва дурнамо”, ки дар толори мақомоти иҷроияи ҳокимияти давлатии шаҳр баргузор гардид, иштирок намуданд.

Аҳмадзода Дилноза, муовини раиси Кумитаи кор бо ҷавонон ва варзиши назди Ҳукумати ҷумҳурӣ конференсияро ифтитоҳ бахшида, тамоми иштирокчиёнро бахшида ба “Соли рушди сайёҳӣ ва ҳунарҳои мардумӣ” табрик намуда, вобаста ба эълон гардидани “Соли рушди сайёҳӣ ва ҳунарҳои мардумӣ” суханронӣ намуданд.

Гуфта шуд, ки маҳсулоти ҳунармандӣ ва намунаҳои фарҳанги суннатӣ яке аз василаҳои ҷалби сайёҳон ба кишвар маҳсуб ёфта, сарзамини мо бо табиати дилошӯбу фарҳанги нотакрораш ҳазорон сайёҳону дӯстдорони табиатро ба сӯи худ ҷалб менамояд. Дар ин радиф бо мақсади рушд додани соҳаи сайёҳӣ, истифодаи самараноки имкониятҳои мавҷуда дар ин самт, инкишофи инфрасохтори сайёҳӣ, беҳтар кардани сифати хизматрасонӣ, густариши раванди танзими давлатӣ ва дастгирии сайёҳии дохилию хориҷӣ, ҷалби ҳарчи бештари сармоя дар ин самт ва омода сохтани кадрҳои болаёқат дар назди Ҳукумати Ҷумҳурии Тоҷикистон сохтори алоҳида оид ба соҳаи сайёҳӣ таъсис дода шуд.

Ҳамчунин зимни суханронӣ Амонзода Ширини Шодӣ, муовини раиси Кумитаи рушди сайёҳии назди Ҳукумати кишвар ва Мирзоалиев Нуралӣ, намояндаи Вазорати фарҳанги ҷумҳурӣ вобаста ба эҳёи ҳунарҳои мардумӣ дар замони соҳибистиқлолӣ баромад намуда, аз таърихи куҳан доштани ҳунарҳои қадимаи миллати тоҷик ва рушди онҳо дар солҳои ваҳдату осоиштагӣ ёдовар шуданд.

Таъкид гардид, ки Тоҷикистон мероси бойи таърихию фарҳангӣ ва дорои захираҳои табиию рекреатсионие мебошад, ки барои рушди ҳам сайёҳии дохилӣ ва ҳам қабули сайёҳони хориҷӣ мусоидат менамояд.

Дар ҷараёни конференсия иштирокчиёни дигар дар мавзуъҳои “Ҳунарманд ҳар куҷо бувад сарфароз”, “Эҳёи ҳунарҳои мардумӣ ва рушди он дар муассисаҳои таълимӣ”, “Нақши анъанаҳои миллӣ дар эҳёи ҳунарҳои мардумӣ”, “Рушди ҳунарҳои мардумӣ дар шаҳри Ҳисор” ва “Баланд бардоштани сифати маҳсулоти ҳунармандон дар Тоҷикистон” маърӯзаҳо намуда, дар охир миёни масъулин ва иштирокчиён музокира ва суолу ҷавоб сурат гирифт.