Дар назди маҷмааи “Наврӯзгоҳ” бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон намоиши дастовардҳои ҳунармандони ҷавон бо унвони “Ҳунарманд ҳар куҷо бувад сарфароз” бахшида ба соли “Рушди сайёҳӣ ва ҳунарҳои мардумӣ” ва Рӯзи ҷавонони Тоҷикистон чорабинии фарҳангию фароғатии бошукӯҳ доир гардид.

Дилноза Аҳмадзода, муовини раиси Кумитаи кор бо ҷавонон ва варзиши назди Ҳукумати ҷумҳурӣ ҳозиринро ба ин чорабинӣ хайрамақдам гуфта, иброз дошт, ки имрӯз саҳми ташкилотҳои гуногуни кор бо ҷавонон дар самти татбиқи сиёсати давлатии ҷавонон назаррас мебошад. Мақсади муаррифии имкониятҳои сайёҳӣ ва ҳунарҳои мардумии мамлакат ин рушди соҳаи сайёҳӣ маҳсуб ёфта, дар ин замина ба инкишофи ҳунарҳои гуногуни мардумӣ заминаи мусоид фароҳам оварда мешавад.

Дар фарҷоми чорабинӣ ҳунармандони ҷавон бо туҳфаҳои хотиравии омода намудаи кумита сарфароз гардонида шуданд.