Дар “Кохи матбуот”-и шаҳри Хуҷанд зимни як нишаст сомонаи туристии вилояти Суғд бо нишонии “www.welcomesugd.tj” (Хуш омадед ба Суғд) муаррифӣ  шуд. Он аввалин сомонаи сайёҳӣ дар минтақа арзёбӣ мешавад.

Ин сомона минбаъд имкониятҳои туристии вилояти Суғдро муаррифӣ мекунад. Созандагони сомонаи “www.welcomesugd.tj”  ва харитаи сайёҳии минтақаи Суғд “Ассотсиатсияи тараққиёти туризми Зарафшон” мебошад.  

Аҳрорхон Хоҷаев - мутахассиси пешбари Раёсати ҷавонон, варзиш ва сайёҳии вилояти Суғд дар бораи вазъи соҳаи сайёҳӣ дар вилоят маълумот дода, афзуд: “Барои амалӣ намудани барномаи рушди туризм дар вилояти Суғд дар давраи солҳои 2015-2017 сомонаи туристии вилоят ба фаъолият оғоз кард. Сомона айни ҳол бо се забон - тоҷикӣ, русӣ ва англисӣ маълумотро дастраси сайёҳон менамояд. Соли 2017 тасмим гирифтем бо дигар забонҳо низ маълумотро бештар дастраси сайёҳон намоем. Ба Тоҷикистон сайёҳони хориҷӣ зиёд диққат медиҳанд аз ин хотир соли ҷорӣ аз 68 давлати дунё 235642 нафар сайёҳ вориди вилояти Суғд гардиданд”.

Сомонаи “www.welcomesugd.tj” имконият фароҳам меорад, ки сайёҳон аз мавзеъҳои таърихӣ ва туристии вилояти Суғд огоҳ бошанд. Дар сомона аксҳои мавзеъҳои сайёҳӣ кӯҳҳо, қалъаҳо, кулҳо ва шаҳрҳо ҷойгир буда, баробари аксҳо ҳамзамон маълумот дар бораи онҳо низ дастраси сайёҳон аст. Ҳамчунин, харитаи сайёҳии вилоят гузошта шудааст, ки сайёҳон метавонанд аз он роҳи макони лозимаи худро интихоб намоянд.

- Яке аз проблемаҳои асосии соҳаи сайёҳии кишвар суст будани маркетинг мебошад. Ҳамчунин гарон будани нархи чиптаҳои ҳавопаймоӣ барои вуруди сайёҳон ба Тоҷикистон монеа мегардад. Тасмим гирифтем бо фаъол намудани махсус сомонаи сайёҳӣ дар самти ҷалби сайёҳон ба Тоҷикистон муваффақ шаваем. Барои ҷалби бештари сайёҳон ширкатҳои туристӣ бо дастгирии ҳукумати ҷумҳурӣ дар намоишҳои байналмилалӣ иштирок менамоянд. Моҳи марти соли ҷорӣ Тоҷикистон якумин маротиба дар намоишҳои байналмилаии “Интурмаркет”-и шаҳри Москваи Федератсияи Русия иштирок кард, ки дар он ширкатҳои туристии вилоят ва осоишгоҳи “Баҳористон” имкониятҳои сайёҳии вилояти Суғдро ба хориҷиён намоиш доданд, - иброз дошт А. Хоҷаев.

Дар охир барои бартараф намудани баъзе аз камбудиҳои ҷойдошта дар сомонаи сайёҳӣ байни рӯзноманигорон ва дигар иштирокчиён мубодилаи афкор сурат гирифт. Гуфта шуд барои фарохтар пешниҳод кардани маълумот дар бораи маконҳои сайёҳии вилоят китобчаи махсус бо забони англисӣ ва русӣ  омода ва нашр шавад.